Болгарияда коррупциялык иштердин бетин ачкан телеберүүнүн авторунун муунтулуп, зордукталган жансыз денеси сейил бактан табылды

Болгарияда коррупциялык иштердин бетин ачкан программанын авторунун муунтулуп, зордукталган жансыз денеси сейил бактан табылды. Бул тууралуу бүгүн, 8-октябрда чет элдик маалымат каражаттары жазып чыкты.

Маалыматка ылайык, коррупциялык схемалардын бетин ачкан “Детектор” телеберүүсүнүн автору Виктория Маринованын жансыз денеси София шаарындагы сейил бактан табылган. Алдын ала маалыматтарга ылайык, 30 жаштагы журналист жарым жылаңач чечинтилип, муунтулуп өлтүрүлгөн. Ошондой эле текшерүүнүн жыйынтыгында зордукталганы аныкталган. Кылмышкер анын уюлдук телефонун, унаасынын ачкычын жана көз айнегин алып кеткен.

Бул окуяга Эл аралык уюмдар жергиликтүү бийликтен кылмыштын бетин тез арада ачып, кылмышка шектүүнү жоопко тартууну талап кылышкан.

"Бул Евробиримдиктеги кызмат учурунда кол салынган төртүнчү журналист болду. Маринова акыркы телеберүүсүндө эки журналист менен маек куруп, Евробиримдик тарабынан каржыланган долбоорлордогу коррупциялык схемалар тууралуу кеп салышкан. Программага катышкан журналист Атилла Биро аталган иликтөө ишине долбоор тарабынан буга чейин дагы тоскоолдуктар болгонун айтып чыккан", - деп жазылат маалыматта.