Футбол аянтчасында дарбаза басып каза болгон баланын апасы: "Окуядан бир күн мурун аянтчага барып балдарды киргизбегиле деп айткам"

Кечээ, 18-октябрда Ленин райондук сотунда футбол аянтчасында дарбаза басып каза болгон 11 жаштагы Алан Айсаев аттуу баланын өлүмү боюнча соттук отурум өтүп, күбөлөрдүн толук келбей калгандыгына байланыштуу кийинки соттук отурум 26-октябрга дайындалды.

Окуя тууралуу каза болгон баланын апасы Нестан Исабекова SUPER.KG'ге төмөндөгүлөрдү айтып берди.

"Балам ар дайым бир жакка чыгарда мени кучактап, сизди сагынам деп бетимден өөп кетчү. Алдырарда жаздырар болуп ошол күнү небереме алаксып жатып баламдын чыгып кеткенин байкабай калыптырмын.

Футбол аянтчасы бизге жакын болгондуктан терезеден көрүнүп турат. Ызы-чуулар көп болот. Эшиги ар дайым ачык турат. Бир күнү ошол жактан кишилер мушташып жатканын көрүп, балама ал жакка барбай жүр деп эскерткем. Окуя болордон бир күн мурун эле аянтчанын администраторуна барып, эшигин жаап, бул жакка балдарды киргизбегиле деп айткам. Эртеси эле окуя болуп, баламдан айрылып калдык. Эми администратор сотто "антип айткан эмес" деп көрсөтмө берип жатат.

Азыр бир баланын өмүрүн алса да футбол аянтчасы ошол бойдон турат. Болгону дарбазасын бир аз байламыш этишиптир. Дагы ушундай окуя болсо ким жооп берет?" - деди каза болгон 11 жаштагы баланын апасы.

Эскерте кетсек, ушул жылдын 13-июнь күнү Бишкек шаарында футбол талаасында орнотулган дарбаза баланы басып калган. Бала алган жаракаттарынан улам көз жумган.

Автор: Бекболот Сарыбаев