Бүгүн, 29-октябрда Жогорку Кеңештин Бюджет жана финансы комитетинин отурумунда 2018-жылдын 8 айына карата республикалык бюджеттин аткарылышынын жыйынтыктары каралууда.
Анда депутат Улан Примов 2018-жылга бюджеттен аймактарды өнүктүрүүгө бөлүнгөн 2 миллиард сом кайда жумшалганын сурады.
“2018-жылга аймактарды өнүктүрүүгө бюджеттен 2 миллиард сом бөлүнгөн. Бул каражаттар каякка, эмне иштерге жумшалды? "Шаарларды өнүктүрүүгө жумшалды" дедиңиз, мага 3 шаарды мисал катары айтып кетсеңиз”, - деди Примов.
Экономика министринин орун басары Автандил Алыбаев 2 миллиард сом өлкөдөгү 20 шаарды өнүктүрүүгө, ошол аймактагы кайра иштетүүчү ишканаларды ачуучу долбоорлорго багытталганын айтты. Ал эми кайсы шаарда кандай иштер аткарылганы тууралуу маалыматты чиновник кагаз жүзүндө берерин убадалады.