Футболчу Ильзат Ахметов Орусиянын улуттук курамасына чакырылды

Кыргыз жеринде туулган футболчу Ильзат Ахметов Орусиянын улуттук курамасына чакырылды. Бул тууралуу Орусиянын Футболдук союзунун расмий баракчасы жарыялады.

Маалым болгондой, 26 оюнчунун катарына кирген Ахметов Евро-2020 мелдешинин тандоо турунун алкагында Бельгия жана Казакстанга каршы беттеште талаага чыгышы мүмкүн. Бельгия-Орусия оюну 21-мартта Брюсселде, ал эми Казакстан-Орусия беттеши 24-мартта Астана шаарында өтөт.

Аталган беттештерге чакырылган футболчулардын тизмеси:

Дарбазачылар: Маринато Гильерме ("Локомотив"), Андрей Лунёв ("Зенит"), Антон Шунин ("Динамо").

Коргоочулар: Максим Беляев ("Арсенал"), Георгий Жикия, Илья Кутепов ("Спартак"), Вячеслав Караваев ("Витесс"), Фёдор Кудряшов ("Истанбул Башакшехир"), Андрей Семёнов ("Ахмат"), Кирилл Набабкин, Марио Фернандес, Георгий Щенников (ЦСКА).

Жарым коргоочулар: Ильзат Ахметов (ЦСКА), Юрий Газинский ("Краснодар"), Александр Головин ("Монако"), Роман Зобнин ("Спартак"), Владислав Игнатьев, Алексей Миранчук, Антон Миранчук ("Локомотив"), Алексей Ионов ("Ростов"), Далер Кузяев, Магомед Оздоев ("Зенит"), Денис Черышев ("Валенсия").

Чабуулчулар: Артём Дзюба ("Зенит"), Фёдор Смолов ("Локомотив"), Фёдор Чалов (ЦСКА).

Ахметов Орусия курамасына алгачкы жолу өткөн жылдын ноябрь айында чакырылган. Бирок жаракат алып калганына байланыштуу курама команданын катарында дебют жасай албай калган. ФИФАнын эрежелерине ылайык, кайсы бир өлкөнүн курама командасынын катарында бир жолу расмий беттешке чыккан оюнчу башка өлкөнүн курамасына кирип ойной албайт. Буга байланыштуу эгерде Ахметов алдыдагы беттештерде талаага чыга турган болсо, Кыргыз курама командасынын катарына кошула албайт.

Жыл башында футбол боюнча Кыргыз курама командасынын капитаны Азамат Байматов социалдык тармактагы баракчасы аркылуу Ильзат Ахметовду улуттук курамга чакырып, оюнчуга кайрылуу жасаган. Башкы машыктыруучу Александр Крестинин да өзүнүн маектеринде Ахметовду улуттук курамага бир нече жолу чакырууга аракет кылганын, бирок оюнчу анын чалууларына жооп бербей койгонун белгилеп келет.

Ильзат Ахметов 1997-жылы Бишкек шаарында туулган. Алгач бишкектик "Алга" футболдук клубунда ойноп келген. 11 жашында үй-бүлөсү менен Орусияга көчүп барып, Юрий Коноплёвдун футбол академиясында тарбияланып баштаган. Андан соң Ильзат Ахметов "Рубин" футболдук клубу менен келишим түзүп, 16 жашында "Рубинде" дебют жасаган. 2018-жылы "ЦСКА" клубуна келип, азыркы учурда негизги оюнчусуна айланып, Чемпиондор Лигасында дагы беттештерге катышканга жетишти.

Ахметов өткөн жылы Орусия футболдук союзу тарабынан "2018-жылдын эң мыкты жаш оюнчусу" деп табылып, "Биринчи бештик" сыйлыгына ээ болгон. Ошондой эле ал УЕФА тарабынан тандалган эң мыкты 50 жаш футболчунун катарына кирген.