Кыргыз жеринде туулган футболчу Ильзат Ахметов 11-ноябрда Орусия Премьер-Лигасынын 14-турунда орун алган ЦСКА - "Зенит" беттешинде жаракат алды. Бул тууралуу орусиялык басылмалар жазышууда.
Белгилүү болгондой, 20 жаштагы оюнчу Себастьян Дриусси менен сүзүшүп кетип жерге кулап түшүп, жаракат алган. Аны оюн талаасынан команданын дарыгерлери көтөрүп кеткен.
Оюндан кийин өткөн маалымат жыйынында ЦСКАнын башкы машыктыруучусу Виктор Гончаренко Ахметовдун абалы тууралуу азыркы тапта так эч нерсе айта албай тургандыгын айткан.
"Азырынча оюнчунун жаракаты канчалык деңгээлде оор экенин айта албайм. Анын ийини чыгып кеткен", - деген Гончаренко.
Айта кетсек, буга чейин Ахметов Орусиянын улуттук курама командасынын кеңейтилген курамына киргени маалым болгон.