Бишкек шаарындагы "Аккула" ат майданында Нооруз майрамына карата көк бөрү боюнча өлкө биринчилиги өтүп жатат. 17-мартта Жогорку лиганын тайпалык баскычы старт алып, алгачкы 2 беттеш орун алды.
А тайпасындагы Талас облусунун "Ынтымак" жана "Бакубат Талас" командаларынын беттешинде "Ынтымак" командасы 11:2 эсебинде жеңишке жетишти.
Ал эми В тайпасында Чүй облусунун 2 командасы беттешип, "Көк жал" командасы 3:2 эсебинде "Четинди" командасын утуп алды.
Бүгүн, 18-мартта тайпалык оюндардын алкагында "Бакубат Талас"-"Төш Булак" жана "Четинди"-"Достук" беттештери орун алат.
Биринчи Лиганын чейрек финалдык оюндарында "Кара-Ой" - "Алкан Ата", "Казарман"-"Илбирс" командалары кез келип, "Алкан Ата" 5:0, "Казарман" 6:5 эсебинде жеңип, жарым финалга аттанышты.
Бүгүн "Кабылан" - "Келечек" жана "Кыраан" - "Соң-Көл" беттештеринде жарым финалга чыгуу үчүн калган 2 жолдомо ойнотулат.
Нооруз майрамына карата уюштурулган мелдеш 21-мартка чейин уланып, көк бөрүдөн сырткары эр эңиш, ат чабыш сыяктуу улуттук ат оюндары боюнча мелдештер өткөрүлөт. Мелдештин жалпы байге фонду 1 миллион 450 миң сомду түзөт.