Стамбул аэропортунан кыргыз кызы жоголду

1-октябрда Стамбул шаарынын аэропортунан Кыргыз жараны Айчүрөк Данияр кызы жоголуп кеткен. Бул тууралуу Түркиядагы мекендештер социалдык баракчаларга жазып чыгышты. Ага ылайык, “24 жаштагы Айчүрөк 1-октябрда Франкфурт шаарынан Стамбулга Turkish Airlines TK1594 рейси менен учуп келген. Анын Стамбулдун аэропортуна келгени видео көзөмөлгө түшүп калган. Бирок кыз паспорттук көзөмөлдөн өткөн эмес. Андан бери Айчүрөк Данияр кызынан кабар жок, байланыш үзүлгөн”, - деп айтылат маалыматта.

Окуянын чоо-жайын билүү максатында кыздын атасына байланыштык: “Кызым Айчүрөк Данияр кызы 1 жарым жылдан бери Франкфурт шаарында окуп, иштеп жүргөн. Ошол күнү транзиттик рейс менен Франкфурттан учуп чыгып, Стамбул аркылуу Бишкекке келмек. Акыркы жолу Франкфурт шаарынан учакка отурарда чалган. Кызыбыз өзүн-өзү билип, бейчеки басып кетчү кыздардан эмес, кантип жакшынакай үйүнө келе жаткан кыз жоголуп кетсин деп, бушайман болуп жатабыз. Кээ бирлери анын стрессте жүргөнүн айтышууда, кимге ишенерибизди билбей жатабыз. Элчиликке, консулдукка жана бардык тиешелүү жерлерге кайрылдык”, - дейт Бекболсун Молдалиев.

Ал эми Кыргыз өлкөсүнүн Стамбул шаарындагы консулдугу бул иш көзөмөлдө экенин, бирок иликтөөнүн купуялуулугунун негизинде маалымат берилбей тургандыгын айтышты.

Автор: Бактыгүл Султаналиева