Вице-премьер Акрам Мадумаров Жалал-Абад жана Ош облустарындагы чек ара тилкелерине барды

Кыргыз Республикасынын вице-премьер-министри Акрам Мадумаров Жалал-Абад жана Ош облустарындагы бир катар чек ара аймактарына барды. Бул тууралуу өкмөттүн басма сөз кызматынан билдиришти.

"Вице-премьер-министр Ала-Бука районунун Көк-Таш, Көк-Серек, Ак-Коргон айыл аймактарындагы, Аксы районунун Кашка-Суу айыл аймагында жана Кербен шаарындагы чек ара тилкелерин кыдырды. Акрам Мадумаров ошондой эле Мамлекеттик чек ара кызматынын чек ара бекеттерине барып, Ала-Бука районундагы Баймак көзөмөл-өткөрмө жайынын ишмердүүлүгү менен таанышты. Сапардын жүрүшүндө вице-премьер-министр тиешелүү кызматтарга жана жергиликтүү өз алдынча башкаруу органдарына чек арачылар үчүн социалдык жашоо-шарттарын жакшыртуу, чек арага жакын жайгашкан айылдарды өнүктүрүү жана социалдык-экономикалык маселелерин чечүү боюнча тапшырмаларды берди", - деп жазылат маалыматта.

Автор: Гүлжамал Абылкасымова