Кытайда кулаган мейманканада каза болгондордун саны 20 кишиге жетти

"Xinjia Express" мейманканасынын урап калганга чейинки көрүнүшү

Кытайдын Фуцзянь провинциясында кулаган 7 кабаттуу мейманканадан каза болгон кишилердин саны 20га жетти. Кырсыктан 41 адам жабыркап, 10 киши урандылар алдында калып, изделип жатканы айтылууда.

Бул тууралуу чет элдик маалымат булактары Кытайдын Өзгөчө кырдаалдар министринин орун басары Шан Юндун маалыматына таянуу менен жазып чыгышты.

“Кулаган мейманканадагы урандылар алдынан куткаруу кызматкерлери 61 кишини алып чыгышты. Алардын ичинен 20 адам каза болгон. 41 киши ар кандай жаракаттарды алганынан улам бейтапканаларга жеткирилген. Уранды алдында калды деген 10 киши учурда дагы деле изделип жатат”, - деп билдирген Шан Юн журналисттерге маалымат берип жатып.

Куткаруу жана издөө иштери аталган жайда дагы деле уланып жатат.

Белгилей кетсек, Кытайдын Цюаньчжоу шаарында карантинге алынган жарандарды кармаган мейманкана ураган. Алдын ала маалыматтар боюнча, мейманкананын биринчи кабатындагы соода маркетинде оңдоп-түзөө иштери жүргүзүлүп жаткан. Жумушчулар кырсык болордон бир нече убакыт мурда мейманкананын ээсине чалып, конструкциялардын биринде деформация пайда болгонун айтышкан. Учурда кырсыктын келип чыгышына эмне себеп болгонун аныктоо иштери жүргүзүлүп жатканын маалымат булактары жазышууда.

Автор: Гүлшат Ысамамат кызы