"Microsoft" компаниясы TikTok'ту сатып алууга 30 миллиард доллар сарптайт

Америкалык "Microsoft" компаниясы TikTok тиркемесин сатып алууга 30 миллиард доллар сарптайт. Бул тууралуу чет элдик маалымат булактары жазышууда.

Маалыматка ылайык, Кытайга тиешелүү социалдык байланыш болгон TikTok 30 миллиард долларга бааланууда. "Microsoft" жана тиркеменин ээси "ByteDance" компаниясы үч аптанын ичинде сүйлөшүүлөрдү аяктоону пландоодо.

Буга чейин АКШнын президенти Дональд Трамп TikTok'ту эгер америкалык компания сатып албаса, өлкө ичинде тиркемени колдонууга тыюу саларын билдирген. Ал тиркеменин америкалык колдонуучуларынын жеке маалыматы кытай бийлигине берилет деп эсептейт.

TikTok тиркемеси 2015-жылы Кытайда ишке киргизилген. Бүгүнкү күндө бул тиркеме социалдык тармактын колдонуучулары арасында популярдуу.

Акыркы эсептөөлөр боюнча, дүйнө жүзүндө TikTok колдонуучуларынын саны 700 миллиондон ашат. Аны 150гө жакын мамлекеттин адамдары колдонушат. Расмий маалыматка караганда, АКШда 30 миллиондон ашык адам бул тиркемени колдонот. Жакынкы жылдары популярдуулугу Инстаграмдан да ашат деген божомолдор айтылып келет.

Автор: Айжанар Рыспек кызы