Бүгүн, 25-декабрь, күнгө жума. Күндөгүдөй эле бул күн да саясий окуяларга, жаңылыктарга бай болду. Алардын баарынан кабардар болууга үлгүрбөй калсаңыз, бул материал сиз үчүн. SUPER.KG порталы күн ичинде орун алган "туздуу" саясий окуялардын топтомун сунуш кылат.
Сот Текебаевди мандатынан ажыратуу чечимин кабыл алды
Жогорку Кеңештин депутаты Өмүрбек Текебаевдин мандаты боюнча Бишкек шаардык соту административдик соттун чечимин күчүндө калтырды.
Акын Темирлан Ормуков БШКнын Өмүрбек Текебаевдин мандатын кайтарып берүү чечимин жокко чыгаруу үчүн административдик сотко кайрылган. 23-ноябрда административдик сот Текебаевдин мандатын кайтарып берүү боюнча БШКнын токтомун жокко чыгарган.
Буга чейин биринчи инстанциянын чечими чыкканда Текебаев: "Ормуковду мен жакшы билем. Мен жеке өзүм, партиябыз анын башына кыйын иштер түшкөндө коргоп жүргөнбүз. Партиянын, "Жалбырак ТВнын" кеңсесинен чыкпай эле жүргөн адам эле. Ал эмне үчүн арыз жазганын башында түшүнбөй жатканбыз. Балким, капа кылып койдукпу деп ойлодук. Бирок кечээ Жапаровдун 7-каналдан түз эфирден чыгып, берген интервьюсунан кийин Ормуковдун арызы боюнча соттун чечими саясий шартталган деген тыянакка келдим. Ормуков “Текебаев акталган жок, азыр деле анын сот иши жүрүп жатат, анан ал тизменин башында эмес, аягына өтүп калган...” дегендей аргумент келтирип жазыптыр. Мен жогоруда айткандай, эки аргументи тең суу кечпейт. Эгерде “соту жүрүп жаткан, актала элек адам эмгек укугунан ажырайт” дей турган болсок, анда Садыр Жапаров премьер-министр да, президенттин милдетин аткаруучу да болмок эмес. Кош стандарттуулук Кыргыз мамлекетинде болбош керек", -
деген.Эске салсак, Өмүрбек Текебаев менен Дүйшөнкул Чотонов 2017-жылы сегиз жылга эркинен ажыратылып, үй-мүлкү конфискацияланган. Бардык инстанциялардын соттору аларды Кыргыз Республикасынын Кылмыш-жаза кодексинин "Коррупция" беренеси боюнча күнөөлүү деп тапкан.
2019-жылдын 21-августунда Жогорку Сот Өмүрбек Текебаев менен Дүйшөнкул Чотоновдун кылмыш ишин жаңы ачылган жагдайларга байланыштуу кайра кароого жөнөтүп, 29-августта алар үй камагына бошотулган.
Фарид Ниязовдун баш коргоо чарасын кароо башка күнгө жылдырылды
Экс-президент Алмазбек Атамбаевдин мурдагы кеңешчиси Фарид Ниязовдун баш коргоо чарасын кароо башка күнгө жылдырылды. Бул тууралуу бүгүн, 25-декабрда SUPER.KG порталы анын жактоочусу Замир Жоошев билдирди.
"Бүгүн Фарид Ниязовдун баш коргоо чарасын өзгөртүү маселеси Бишкек шаардык сотто каралбай калды. Себеби ал киши СИЗОдон сотко алып келинбептир. Мыйзамга ылайык, Ниязов соттук отурумда катышышы керек. Коронавируска байланыштуу СИЗОдон кишилерди алып чыкпай жатышкан экен. Мындан улам соттук отурум 28-декабрь саат 14:00дө өтө турган болду", - деди ал.
Фарид Ниязов Биринчи Май райондук соттун чечими менен 10-февралга чейин камакта калтырылган.
"Ал англис тилинде эркин сүйлөйт". Тилек Токтогазиев жаңы орун басарын дайындады
Айыл-чарба тамак-аш өнөр жайы жана мелиорация министри Тилек Токтогазиевдин орун басары Амангелди Исаев кызматтан кетип, анын ордуна Бермет Турсалиева дайындалды. Бул тууралуу Тилек Токтогазиев маалымат жыйынында билдирген.
Токтогазиевдин айтымында, министрликтин тарыхында алгачкы ирет аял киши министрдин орун басары болуп жатат.
"Мага күчтүү орун басар керек. Турсалиева мурда министрликте иштебесе да, айыл-чарба тармагында көп эмгек жасаган. Дыйкандар менен тыгыз иштешип келген. Ал англис тилинде эркин сүйлөйт", - деген Токтогазиев.
Депутаттар 30-декабрдан 8-январга чейин эл менен жолугат
Жогорку Кеңештин депутаттары эл менен жолукмай болушту. Бул тууралуу токтом долбоору кечээ, 24-декабрда парламенттин жыйынында кабыл алынды.
"Жогорку Кеӊештин регламентине ылайык, депутаттар 2020-жылдын 30-декабрдан 8-январга чейинки мезгил аралыгында өлкө аймагындагы шайлоочулар менен жеринде иш алып баруу чечимине келишти", - деп жазылат токтом долбоорунда.
Айрымдар депутаттар эл менен жолугуу үчүн эмес, жаңы жылдык эс алууга карата жумушка чыкпоо максатында мындай токтом долбоорун кабыл алышканын жазышууда.
