Бүгүн, 29-декабрь, күнгө шейшемби. Күндөгүдөй эле бул күн да саясий окуяларга, жаңылыктарга бай болду. Алардын баарынан кабардар болууга үлгүрбөй калсаңыз, бул материал сиз үчүн. SUPER.KG порталы күн ичинде орун алган "туздуу" саясий окуялардын топтомун сунуш кылат.
Алгачкы теледебатка президенттикке талапкерлердин алтоо чыгышты
28-декабрда КТРКда президенттикке талапкерлердин алгачкы
дебаты өттү. Ага
Канатбек Исаев, Клара Сооронкулова, Адахан Мадумаров, Аймен Касенов, Бактыбек Калмаматов жана
Каныбек Иманалиев катышты. Анда талапкерлер
Садыр Жапаровго карата сындарды айтышты. Теледебатта президенттикке талапкерлерге сот системи, мамлекетти башкаруу формасы, чек ара маселеси боюнча суроолор берилди.
Бүгүн, 29-декабрда Имамидин Ташов, Эльдар Абакиров, Мыктыбек Арстанбек, Садыр Жапаров, Рашид Тагаев, Арстанбек Абдылдаев теледебатка катышары күтүлүүдө.
Мөөнөтүнөн мурда өтүүчү президенттик шайлоо 2021-жылдын 10-январына дайындалган. Учурда үгүт иштери жүрүп жатат.
Бишкек шаардык соту Фарид Ниязовду үй камагына чыгаруудан баш тартты
Бишкек шаардык соту президенттик аппараттын мурдагы башчысы Фарид Ниязовду үй камагына чыгаруудан баш тартты. Бул тууралуу анын жактоочусу Замир Жоошев билдирди.
Соттун чечими менен Фарид Ниязов 10-февралга чейин камакта калтырылды.
Фарид Ниязов Биринчи Май райондук сотунун чечими менен 10-февралга чейин камакта калтырылган. Жактоочу шаардык сотко үй камагына чыгаруу өтүнүчү менен кайрылган.
Буга чейин Фарид Ниязов соттук отурумга алынып келбеген үчүн жылдырылган.
Фарид Ниязов Кой-Таш окуясынан тышкары Жазык кодексинин 264-беренеси ("массалык баш аламандыкты уюштуруу") боюнча дагы айыпталып жатат.
Бүгүн добуш берүү үчүн каттоону алмаштыруунун акыркы күнү
29-декабрь добуш берүү үчүн каттоону алмаштыруунун акыркы күнү. Бул тууралуу Борбордук шайлоо комиссиясынын басма сөз кызматынан кабарлашты.
Маалыматка ылайык, 2004-жылдын үлгүсүндөгү (AN) паспорту бар, жашаган жеринин каттоо дарегин алмаштырган, бирок ошол эле учурда жашаган жеринин каттоосунун дарегине ылайык паспортун алмаштырбаган шайлоочулар туруктуу жашаган жери боюнча шайлоо участогуна келип, шайлоочулардын тизмесиндеги маалыматтарды тактоо жөнүндө арыз (мурдагы 1-форма) бере алышат.
2017-жылдын үлгүсүндөгү (eID) паспорту бар шайлоочулар туруктуу жашаган жеринин каттоо дарегине жана бекитилген чек араларына ылайык тиешелүү шайлоо участогундагы шайлоочулардын тизмесине киргизилет.
"Ар бир шайлоочу 19-ноябрдан 29-декабрга чейин шайлоо участогуна келип, шайлоочулардын «Тизме» мамлекеттик порталынан, 119 номуруна чалып, 119 номуруна жеке ПИН номуру менен смс жөнөтүп, өзүн шайлоочулардын тизмесинен тактай алат.
2-форма жокко чыгарылгандыгына байланыштуу каттоо эсеби жаранды тигил же бул шайлоо участогуна киргизүүнүн критерийи болуп саналат.
Калкты тейлөө борборлору жана Калкты паспорттоштуруу жана каттоо бөлүмдөрү 31-декабрга чейин саат 9:00дөн 20:00гө чейин дем алышсыз иштээрин БШК эске салат", - деп айтылат маалыматта.
Президенттикке аттанып жаткан 4 талапкер биригүү чечимин кабыл алышты
Президенттикке аттанып жаткан 4 талапкер биригүү меморандум кабыл алышты. Бул тууралуу алар бүгүн, 29-декабрда маалымат жыйын берип жатканда билдиришти.
Клара Сооронкулова, Адахан Мадумаров, Каныбек Иманалиев жана Канатбек Исаев эгер шайлоонун экинчи туру болсо арасынан бирдиктүү талапкерди колдоп чыгуу чечимине келишти. Маалымат жыйынында алар президенттикке талапкер Садыр Жапаров административдик ресурс колдонуп жатканын билдиришип, бир топ сындарды айтышты.
Кечээ бул талапкерлер КТРКда теледебатка катышышкан.
Мөөнөтүнөн мурда өтүүчү президенттик шайлоо 2021-жылдын 10-январына дайындалган. Учурда үгүт иштери жүрүп жатат.
