Депутат Архив агенттигинин жетекчиси бюджети тууралуу туура эмес маалымат берип жатканын айтып, аны сындады

Депутат Аалы Карашев Мамлекеттик каттоо кызматына караштуу Архив агенттигинин жетекчиси бюджет тууралуу туура эмес маалымат берип жатканын айтып, аны сындады. Бул тууралуу ал бүгүн, 13-январда Жогорку Кеңештин жыйынында билдирди.

Мамлекеттик каттоо кызматына караштуу Архив агенттигинин директору Мария Алыбаева аталган тармакта иштегендердин айлык маянасы 7-8 миң сомдун тегерегинде экенин белгиледи. "Ал эми аталган агенттиктин бюджети 24 миллион сом", - деп маалымат берди.

Депутат Аалы Карашев: "535 кызматкер иштейт дедиңиз. Алар 7-8 миң сомдон айлык аларын да билдирдиңиз. Эсептесек айлык маянага жыл сайын 50 миллион сомдон ашуун каражат кетет экен. Андыктан маалыматты так билбесеңиз, бюджети тууралуу туура эмес жооп бербеңиз", - деди.

Автор: Жылдыз Джускембаева