Элмирбек Иманалиевдин атын Киев көчөсүнө берүү боюнча Бишкек шаардык кеңешине кат жөнөтүлдү

Кыргыз Республикасынын Эл артисти, төкмө акын Элмирбек Иманалиевдин ысымын Бишкек шаарындагы Киев көчөсүнө ыйгаруу боюнча шаардык кеңешке расмий түрдө кат жөнөтүлдү. Бул тууралуу аталган сунуштун демилгечиси Алмазбек Абдисияев SUPER.KG порталына билдирди.

"Мен бул маселени төкмө акындын көзү өткөндөн бери эле көтөрүп келе жатам. Элмирбек экөөбүз бир райондун балдарыбыз, жакын дос элек. Анын элге кадыры кандай болгонун айтпасак деле белгилүү. Анан ушундай адамдын ысымы көрүнүктүү бир жерге берилсе эмнеге болбосун? Мен Киев көчөсүнүн атын Элмирбек Иманалиев атындагы көчө деп өзгөртүүнү сунуштап жатам. Бул көчөнүн башы Бүбүсара Бейшеналиева атындагы көчө менен башталып, Темиркул Үмөталиев, Жусуп Турусбеков, Калык Акиев, Манас көчөлөрү менен кесилишет. Ушундай залкар инсандардын ысымына катарлаш Элмирбек Иманалиев атындагы көчө болсо кандай жакшы. Мен кечээ расмий түрдө Бишкек шаардык кеңешине жана шаар мэри Балбак Түлөбаевге кат жолдодум", - дейт Абдисияев.