Бүгүн, 10-февраль, күнгө шаршемби. Саясий окуялардан кабардар болууга үлгүрбөй калсаңыз, бул материал сиз үчүн. SUPER.KG порталы күн ичинде орун алган "туздуу" саясий окуялардын топтомун сунуш кылат.
Бишкектин мэриясына жаңы жетекчи келди
Бишкек шаарынын мэринин милдетин аткаруучу болуп Бактыбек Кудайбергенов дайындалды.
Аталган чечимге премьер-министр Улукбек Марипов кол койгон.
"Премьер-министр Улукбек Мариповдун башка чечими менен Нургазиев Эрмек Белековичти Бишкек шаарынын жаңы мэри шайланганга чейин Бишкек шаарынын мэринин милдетин аткаруучу катары дайындоо тууралуу чечими жокко чыгарылды", - деп жазылат билдирүүдө.
Бактыбек Кудайбергенов буга чейин өкмөттүн Чүй облусундагы өкүлү, Ысык-Ата районунун акими болуп иштеген. 2020-жылы "Кыргызстан" саясий партиясы менен бирге шайлоого аттанып, талапкерлигин койгон. Айрым социалдык тармактын колдонуучулары Кудайбергеновдун талапкерлигине каршы пикирлерин жазышууда. Ал аталган партиядан талапкер болгонуна нааразы болгондор да бар.
Буга чейин мэрдин милдетин аткарып келген Балбак Түлөбаев кызматтан кетип, анын ордуна Эрмек Нургазиев жетекчи болгондугу кабарланган. Кийинчерээк президент Садыр Жапаров Нургазиевдин мэр болуп келишине каршы пикирин социалдык тармактагы баракчасына жазган.
Депутат премьер-министрди мэрдин милдетин аткаруучуну дайындоодо мыйзам бузбоого чакырды
Депутат Кенжебек Бокоев премьер-министрди мэрдин милдетин аткаруучуну дайындоодо мыйзам бузбоого чакырды. Бул тууралуу ал бүгүн, 10-февралда Жогорку Кеңештин жыйынында билдирди.
"Бир нече күндөн бери Бишкек шаарынын мэрин убактылуу дайындоо боюнча ызы-чуу болуп жатат. Мыйзамдын аткарылышын көзөмөлдөө парламентте болуп жатат. Ошондуктан мыйзамдын нормасын өкмөткө эскертип коёюн. Шаардын мэри кызматынан мөөнөтүнөн мурда бошотулган учурда шаардын мэри шайланганга чейин биринчи вице-мэрге жүктөлөт. Биринчи вице-мэрдин кызмат орду жок болгон учурда вице-мэрге жүктөлөт деп мыйзамда так жазылган. Урматтуу өкмөт башчы, убактылуу мэрди шайлаганда ушул мыйзамды караш керек. Сырттан башка талапкерлерди алып келүүнүн кереги жок. Бул мыйзамдын талабы. Өкмөткө реакция кылып коёлу", - деди ал.
Бактыбек Аманбаев Кыргыз өлкөсүнүн АКШдагы элчиси кызматына барары айтылды
Социалдык тармактарда Бактыбек Аманбаев Кыргыз мамлекетинин АКШдагы элчиси кызматына барат деген маалыматтар айтылууда.
Бактыбек Аманбаев SUPER.KG порталына бул боюнча сунуш түшкөнүн ырастады. "Бул татаал процесс. Мага бул кызматка баруу сунушу болгон. Бирок мунун механизми чечиле элек. Бир катар иш-чаралар аткарылышы керек", - деди ал.
Буга чейин Бактыбек Аманбаев өкмөттүн аппаратынын жетекчиси кызматын ээлеп келген. Ал өкмөттүн жаңы курамы түзүлгөндө кызматтан бошотулган. Ал 2020-жылы парламенттик шайлоого "Мекенчил" партиясы менен аттанган.
Жогорку Кеңеш кийинки аптада жаңы Конституцияны талкуулашат
Кийинки аптада Жогорку Кеңеште Конституциянын жаңы долбоору талкууланат. Бул тууралуу бүгүн, 10-февралда парламенттин жыйынында спикер Талант Мамытов билдирди.
"Баш мыйзамдын долбоору конституциялык кеңешмеден келип түштү. Кийинки аптада бул маселени карап чыгуу сунушу келди. 17-февралда демилгечилер эки маселе каралып бүткөн долбоорду карайбыз. Кулактандыруу катары айтып коёюн", - деди ал.
Жогорку Кеңештин сайтына Конституциянын жаңы долбоору илинди. Былтыркы жылы 17-ноябрда Жогорку Кеңеш Баш мыйзамдын жаңы долбоорун коомдук талкууга коюп, 20-ноябрда конституциялык кеңешме түзүлгөн болчу.
Бишкек шаарынын мэринин милдетин аткаруучу болуп Бактыбек Кудайбергенов 
