Ырчы Анжелика: "Кырсыктап калганда Сабырбек Жумабеков операция жасап, бутума тургузат дегем"

Ырчы Анжелика автокырсыкка кабылганда чет өлкөгө барып дарылануу оюнда болбогонун айтат. Айтымында, операцияны академик Сабырбек Жумабеков жасайт деген ишеничи болгонун SUPER.KG сайтына берген маегинде айтты.

"Кырсыктап калганда дароо эле Сабырбек Жумабеков операция жасап, бутума тургузат дегем. Анткени ал ары оор, ары таң калычтуу операцияларды жасаганы менен белгилүү эмеспи.Сабырбек Жумабеков тамашалап "чет өлкөгө барсаң деле мени чакырышмак, бирок операцияны башкача акча менен жасатмаксың" деп айтты. Чет өлкөгө барып дарылануу тууралуу оюм болгон жок. Мындан ары деле болбойт.

Бизде деле мыкты, мыкты дарыгерлер бар. Болгону нейрохирургия боюнча адистер, аппараттар жетишсиз экен", - дейт ырчы.

Эске салсак, Анжелика 23-январда жол кырсыгына кабылып, анын кесепетинен өзү жана 5 жаштагы кызы жаракат алганы маалымдалган. Ысык-Көл облусунун Түп райондук ооруканасынан кырсык тууралуу маалымат беришкен. 24-январда ырчыга шашылыш операция, 25-январда 5 жаштагы кызына операция жасалган.

Кийинчерээк, ырчынын улуу кызы Айымага да операция жасалары күтүлүп жатканы белгилүү болгон. Академик Сабырбек Жумабеков Анжелика балдак менен басып баштаганын, ал эми анын улуу кызы Айыманын моюн омурткасына операция жасалганын, абалы канааттандырарлык экенин билдирген.