Өлкөгө бир жарым тоннага чукул курманы мыйзамсыз ташып кирүү аракети ишке ашпай калды

Баткен облусунда кургатылган жемиштерди өлкө аймагына мыйзамсыз ташып келе жаткан Тажик жараны кармалды. Бул тууралуу Чек ара кызматына байланышканыбызда белгилүү болду.

Маалым болгондой, 16-мартта мамлекеттик чек ара аркылуу контрабандалык жүк алып өтүү аракетине бөгөт коюлду.

"Лейлек районунун Борбордук айылына жакын жерде нөөмөттө турган учурда чек арачылар контрабандалык жүктөрдү мыйзамсыз ташууга аракет кылган 1985-жылы туулган Тажикстандын жараны башкарып бара жаткан Портер унаасын токтотушкан. Унаада 1 тонна 475 килограмм кургатылган курма Кыргыз өлкөсүнө ташылып келе жаткан. Алдын ала маалыматтар боюнча жүктүн баасы 265 миң сомду түзөт", - дешти мекемеден.

Тиешелүү иш кагаздары толтурулгандан кийин кармалган жарандар жана контрабандалык жүк териштирүү иштерин жүргүзүү үчүн тиешелүү органдарга өткөрүлүп берилди.