"Мобилдүү үйлөрдө, чатырларда жашап жатышат". Баткенде чек арада жабыркаган үй-бүлөлөрдүн балдарын куттукташты

Министрлер кабинетинин Баткен облусундагы ыйгарым укуктуу өкүлү чек арада жабыркаган үй-бүлөлөрдүн балдарын майрамы менен куттуктады. Бул тууралуу аталган администрациянын басма сөз кызматынан билдиришти.

Маалыматка ылайык, министрлер кабинетинин Баткендеги ыйгарым укуктуу өкүлүнүн орун басары Абдирашит Ташбалтаев Көк-Терек жана Таш-Тумшук айылдарындагы балдарды 1-июнь Балдарды коргоонун эл аралык күнү менен куттуктап барды.

"Ал белектерди тапшырып, балдарга кең келечек каалады. Жалпы 21 үй-бүлөгө окуу китептери менен суусундуктар, оюнчуктар салынган баштыктар тапшырылды. Ал эми Баткен районунун акими ар бир үй-бүлөгө акчалай жардам көрсөттү.

Белгилей кетсек, тажик тараптын кол салуусунан улам аталган айылдарда турак жайсыз калган жарандар учурда убактылуу мобилдүү үйлөрдө, чатырларда жашап турушат", - деп билдиришти аталган мекемеден.

Автор: Гүлзина Каныбекова