Бишкекте орто кесиптик окуу жайларды өнүктүрүү пландары талкууланды

Бишкекте билим берүү жана илим министри Болотбек Купешев колледждердин директорлору менен жолугушту. Бул тууралуу министрликтин маалымат кызматынан билдиришти.

Ага ылайык, жолугушууда пандемия шарттарындагы 2020-2021-окуу жылынын жыйынтыктары, орто кесиптик билим берүү системасындагы жетишкендиктер жана көйгөйлөр талкууланды.

"Окуу жылы коронавирус пандемиясына байланыштуу онлайн режимде башталган. Негизинен онлайн режимде сабактарды өтүү үчүн Zoom meetings, Google classroom, Google meet, web WhatsApp жана башка платформалар колдонулууда.

Бүгүнкү күндө колледждердин 80 пайыздан ашууну AVN, E-BILIM, MOODLE башкаруунун автоматташтырылган системасына туташтырылган", - деп жазылат маалыматта.

Жолугушуу маалында орто кесиптик окуу жайларга:

- орто кесиптик окуу жайлар арасындагы академиялык мобилдүүлүктү орнотуу жана өнүктүрүү;

- орто кесиптик окуу жайлардын жеке сектор менен туруктуу негиздеги кызматташтыгын жолго коюу жана кырдаалга дайыма мониторинг жүргүзүп туруу;

- жумуш берүүчүлөрдү жана башка кызыкдар тараптарды орто кесиптик билим берүү программаларын иштеп чыгууга тартуу;

- республиканын чөлкөмдөрүндөгү экономиканын реалдуу секторунун керектөөлөрүн эске алуу менен ортоңку звенодогу адистерди даярдоо боюнча билим берүү программаларынын спектрин кеңейтүү жана аларды рыноктун учурдагы керектөөлөрүнө ыңгайлаштыруу;

- ЕАЭБдин ишмердүүлүгүнүн алкагында агроөнөр жай комплексин жана текстил өнөр жайын өнүктүрүү үчүн зарыл болгон төмөнкүдөй багыттар боюнча орто кесиптик билим берүү программаларын иштеп чыгуу:

- адистештирилген эт жана сүт мал чарбачылыгы;

- эрте бышуучу жашылчаларды өстүрүү үчүн күнөскана чарбасын өнүктүрүү;

- логистикалык инфраструктура объекттерин (жашылча сактагычтарды, кампаларды ж.б.) куруу;

- биотехнологиялык продуктуларды өндүрүү максатында дан өсүмдүктөрүн кайра иштетүү;

- бак өстүрүүнү өнүктүрүү жана жергиликтүү чийки заттан табигый ширелерди өндүрүү;

- продуктуларды жана кызмат көрсөтүүлөрдү стандартташтыруу жаатында жогорку квалификациялуу адистерди даярдоо боюнча программаны иштеп чыгуу, негизги кесиптик билим берүү программасын өздөштүрүү менен катар стандартташтыруу жаатында кошумча билим берүүнү киргизүү сунушталды.

Автор: Айжанар Рыспек кызы
Фото: Билим берүү жана илим министрлигинин маалымат кызматы