Арасында 4 жашар бала бар. Ошто дарыяга түшүп кеткен унаадагы жүргүнчүлөр изделүүдө

Ошто Тар дарыясына түшүп кеткен үч адам изделүүдө. Алардын арасында 4 жашар бала бар.

Өзгөчө кырдаалдар министрлигинин маалымат кызматынан кабарлашкандай, 24-июнда саат 22:18 чамасында Көңдүк айылында Асыран Бий көпүрөсүнөн Хёндай Портер унаасынын айдоочусу рулга ээ боло албай, Тар дарыясына түшүп кеткен. Унаанын ичинде 5 адам болгон.

"Куткаруучулар жеткенге чейин жергиликтүү тургундар 1980-жылы туулган Ж.Т. (айдоочу) жана 2008-жылы туулган А.К. аттуу кызды куткарып калган. Ал эми 1984-жылы туулган М. Г., 2017-жылы туулган А.Ф. жана 1993-жылы туулган М.Э. дайынсыз болуп, изделүүдө.

Бүгүнкү издөө иштерине 25 куткаруучу, ИИМден 35 кызматкер, жергиликтүү тургундардан 50 адам тартылды", - деп билдиришти мекемеден.

Автор: Бактыгүл Момбекова
Фото: ӨКМнын басма сөз кызматы