Лейлекте сел ташкыны өспүрүмдү агызып, ал каза болду (видео)

Баткен облусунун Лейлек районунда сел жүрүп, өспүрүм каза болду. Бул тууралуу ӨКМнын маалымат кызматынан билдиришти.

Алдын ала маалымат боюнча, бүгүн, 19-июлда саат 17:30 чамасында катуу жаап өткөн жамгырдын кесепетинен Козу-Баглан, Катраң, Лейлек, Тогуз-Булак, Айкөл айылдарында жана Исфана шаарынын Голбо, Чымген айылдарында сел жүрдү. Сел ташкынынын кесепетинен турак үйлөрдүн короолорун, ички чарбалык унаа жолдордорду, арыктарды жана көпүрөлөрдү суу каптаган. Мындан сырткары Ак-Терек айылында 25 турак үйдүн ичине сел суулары кирип, 20 турак үйдүн, 1 мектеп, 1 бала бакча жана 1 мечиттин короосун сел суулары каптаган.

"2005-жылы туулган А. уулу А. аттуу баланы сел агызып кеткен, көп өтпөй жергиликтүү тургундар тарабынан анын жансыз денеси табылды.

Жеринде Лейлек райондук өзгөчө кырдаалдар бөлүмүнүн ыкчам тобу жана райондук жарандык коргонуу комиссиясы, Кризистик кырдаалдарда башкаруу борборунан жана Баткен облустук башкармалыгынын ыкчам топтору иш алып барууда", - деп айтылат маалыматта.

Видеонун автору Лейлек айылдык кеңешинин жооптуу катчысы Кубанычбек Жапаров.

Автор: Бактыгүл Момбекова