Бүгүн, 10-августта тышкы иштер министри Руслан Казакбаев Орусиянын Кыргыз өлкөсүндөгү элчиси Николай Удовиченко менен жолугушуу өткөрдү. Бул тууралуу аталган министрликтин басма сөз кызматынан кабарлашты.
Жолугушуунун жүрүшүндө тараптар Бишкек шаарындагы “Технопарк” оюн-зоок борборунда орун алган Кыргыз Республикасынын жараны менен аталган мекеменин кызматкери, орус улутундагы Кыргыз Республикасынын жаранынын ортосунда болгон окуяны талкуулашты.
Тышкы иштер министрлигинен бул сыяктуу бардык окуяларга кылдат байкоо салып, ыкчам чара көрө тургандыгын маалымдашты.
Улуттук коопсуздук мамлекеттик комитети бейбаштык кылган жаранга расмий эскертүү берип, "терисинин түсүнө, расасына, этникалык жана расалык, улуттук жана диний жек көрүүчүлүккө же кастыкка карата дискредитациялоо 10 жылга чейин эркинен ажыратууга алып келген кылмыш болуп саналгандыгын" эскертти.
Министр Казакбаев Кыргыз өлкөсү көп улуттуу өлкө экенин жана Кыргыз Республикасынын Конституциясына ылайык, эч кимди жынысына, расасына, тилине, улутуна, динине, жашына, саясий же башка ишенимдерине карап басмырлоого болбойт деп баса белгиледи.
Бул багытта ички улутчулдуктун айрым учурлары орус бийлиги тарабынан Кыргыз өлкөсүндөгү этникалык орустардын укуктарын жана кызыкчылыктарын системалуу түрдө бузуу, жарандарды этникалык жана диний негизде кысымга алуу катары көрсөтүлбөшү керектиги белгиленди.
Бул жагынан алганда, Казакбаев Орусиянын дипломатиялык өкүлчүлүгүнөн айрым орус саясатчыларынын көңүлүн мындай көйгөйлөр боюнча кескин билдирүүлөрдүн жана аларды эки өлкөнү байланыштырган тарыхый достук мамилелерге шынаа кагууга аракет кылган айрым провокациялык элементтердин көңүлүн алууга тырышып, коомдук мейкиндикке алып чыгууга чакыруу кабыл алынгыс экендигине бурууну суранган.
"Тышкы иштер министрлигинин башчысы Кыргыз өлкөсүндө русофобия жана агрессивдүү улутчулдуктун башка түрлөрү, тарыхты кайра жазуу, эстеликтер жана орус тили менен күрөшүү фактылары жок экенин баса белгиледи. Ал постсоветтик мейкиндикте Беларусь Республикасы менен катар Кыргыз өлкөсүндө гана орус тили расмий тил экенин баса белгиледи. Кыргыз мамлекетинде орус тили медиа тармагында, билим берүү, саламаттыкты сактоо, маданий жаатында жана жашоонун бардык чөйрөлөрүндө көрсөтүлгөн. Ал биздин өлкөдө туруктуу жашаган орус тилдүү калктын руханий жана социалдык муктаждыктарын толук канааттандыруусу үчүн орус тилинин макамын коргоо курсу улантыларына ишендирди", - деп жазылат билдирүүдө.
Тараптар көйгөйдүн андан ары курчушуна жол бербөө үчүн конструктивдүү түрдө биргелешкен иш-аракеттерди көрүүнүн жана союздаштык жана стратегиялык өнөктөштүктүн рухунда артыкчылыктуу мүнөзгө ээ болгон кыргыз-орус мамилелериндеги терс кесепеттерди болтурбоонун зарылдыгын белгилешти.
Эске салсак, Бишкекте балдар паркында сатуучу кызды калькулятор менен башка чаап жиберген видео тараган. Октябрь райондук милициясынан билдиргендей, окуя 2-август күнү Горький жана 7-Апрель көчөлөрүнүн кесилишиндеги соода борборунда болгон. Арыз жазган кыздын айтымында, ал күнү бейтааныш эркек киши мас болуп алып, аны менен урушуп, сөгүнгөн. Чатакташып жатканда калькулятор менен башка чаап жиберген.
Бул окуя боюнча Орусиянын Кыргыз өлкөсүндөгү элчиси Николай Удовиченко социалдык тармактагы баракчасы аркылуу оюн билдиргенин жергиликтүү басылмалар жазып чыккан.
