Бишкекте курулушу жүрүп жаткан көп кабаттуу имараттан жылыткычтарды уурдагандар кармалды. Шектүүлөр 85 миң сом зыян келтиришкен

Бишкекте курулуш иштери жүрүп жаткан көп кабаттуу имараттан жылыткычтарды уурдаганга шектелген жарандар кармалды. Бишкектин Октябрь РИИБинин маалымат кызматынан кабарлашкандай, келтирилген зыяндын жалпы суммасы 85 миң сомду түзөт.

Билдирүүгө караганда, 28-августта шаар тургуну укук коргоочуларга арыз менен кайрылып, 27-августка караган түнү 17 даана биметаллдык жылыткычтарды уурдап кеткендерге карата чара көрүүнү өтүнгөн. Келтирилген материалдык зыян 85 миң сомду түзгөн.

"Бул факты Кылмыштардын жана жоруктардын бирдиктүү реестрине 200-берене (уурулук) менен катталып, териштирүү иштери башталган.

Ыкчам издөө иштеринин жүрүшүндө шектүүлөр кылмыш жасаган күнү Дэу Сиело унаасы менен жүрүшкөнү, аталган унаа Жалал-Абад облусунда экени аныкталган. Октябрь РИИБинин кызматкерлери Жалал-Абад облусуна жөнөшүп, шектүү катары 37 жаштагы эки адамды кармашкан. Учурда тергөө иштери улантылууда", - дешти мекемеден.

Автор: Бактыгүл Момбекова