Ош шаарынын мэри муниципалдык менчик башкармалыгынын ишин күчөтүү талабын койду

Бүгүн, 30-сентябрда Ош шаарынын мэриясынын кезектеги коллегиялык жыйыны болуп өттү. Анда Ош шаарынын мэриясынын муниципалдык менчик башкармалыгынын ишмердүүлүгү жана муниципалдык турак-жай коммуналдык башкармалыгы тарабынан аткарылып жаткан иштер боюнча күн тартибине эки маселе коюлду. Бул тууралуу шаардык мэриясынан билдиришти.

Ош шаарынын мэри Алмаз Мамбетов жана коллегиялык жыйындын катышуучулары аталган кызматтар тарабынан айтылган 8 айдын жыйынтыктарын угуп, токтом кабыл алды.

Шаар башчысы муниципалдык менчик башкармалыгы тарабынан аткарылып жаткан иштер көңүл жылытарлык эмес деп белгиледи. Анткени салык кызматынан кийин эле жергиликтүү бюджеттин казынасын толтурууга кам көргөн ишкана болуп туруп, толук кандуу иштер жүрбөй жаткандыгына токтолду. Аны менен катар аталган ишкананын башчысына катуу эскертүү берип, орун басарлардын жана бөлүм башчылардын иш орунун карап, аткарып жаткан жумуштары боюнча дыкат текшерүүнү талап кылды. Мындан тышкары, муниципалдык аймактык башкармалыктар менен биргеликте мыйзамсыз курулуштарды алып салуу, өз билемдик менен турган соода түйүндөрүн болтурбоо иштерин тынымсыз жүргүзүү тапшырмасын берди.

Жыйында мыйзамсыз курулуштар менен иштеп жаткан кызматкерлердин айлык акыларын көтөрүү жаатында да сунуштар берилди.

Башкармалык тарабынан 8 айда жергиликтүү бюджетке пландалган акча каражатын түшүрүү 100 пайызга аткарылган, өткөн жылга салыштырмалуу 51,9 пайызга көп. 367 ижара келишимдери түзүлгөн. Мыйзамсыз курулуштарды алып салуу иштеринин алкагында 108 соода түйүнү, 11 даана контейнер, 279 темир гараж, 44 капиталдык курулуш, 2610 метр капиталдык курулган тосмо, 3200 метр ар түрдүү темир тосмолор, 460 прилавкалар алынган.

Автор: Айсалкын Качкынбекова