Таласта Келдибековдун тарапташтары митинг өткөрүүнү пландашууда

Талас облусунун Манас районунда 12-декабрда депутат Ахматбековду колдогондор митинг өткөрүүнү пландашууда. Бул тууралуу SUPER.KG порталына “Ата Журт” фракциясынын басма сөз кызматынын өкүлү Нургазы Анаркулов билдирди.

Митингдин максаты саруулуктарды, камалган Ахматбек Келдибековду колдоо, "Кумтөр" жана "Жер-Үй" маселелерин талкуулоо болуп эсептелет. Митингге “Ата Журт” партиясынын жергиликтүү өкүлдөрү катышат.

Эске салсак, Жогорку Кеңештин депутаты Ахматбек Келдибеков "коррупция" жана "кызмат абалынан кыянаттык менен пайдалануу беренелерине" ылайык 20-ноябрда кармалган. 22-ноябрда Октябрь райондук соту депутатты баш коргоо чарасы менен 2 ай камоо чечимин чыгарган. Адвокаттардын депутатты үй камагына чыгаруу боюнча өтүнүчү Бишкек шаардык сотуна жөнөтүлгөн эле.

Кечээ, 2-декабрда Бишкек шаардык соту депутат Ахматбек Келдибековдун ишин карап чыгып, Октябрь райондук соту чыгарган чечимди күчүндө калтырды. Сот чечимине ылайык Ахматбек Келдибеков 2014-жылдын 19-январына чейин УКМКнын тергөө абагында отурат.

Автор: Айпери Ганыжан кызы