Чүйдө 2 кабаттуу үйдүн чатырынан кулап кеткен адамга жардам көрсөтүлдү

Чүй облусунда ӨКМнын куткаруучулары курулуп жаткан үйдүн чатырынан кулап кеткен жаранга жардам көрсөттү. Бул тууралуу Өзгөчө кырдаалдар министрлигинин басма сөз кызматынан кабарлашты.

Маалыматка ылайык, бүгүн, 23-июль күнү Чүй облусунун Ысык-Ата районуна караштуу Учкун 2 жаңы конушунун жанында курулуп жаткан 2 кабаттуу үйдүн чатырынан 1968-жылы туулган М.Т. аттуу эркек киши кулап түшкөн.

Жерине ӨКМнын Бишкек шаардык куткаруу кызматынан 5 куткаруучу тартылып, жаранды атайы шаймандардын жардамы менен жерге түшүрүп, биринчи медициналык жардам көрсөтүлгөн. Андан соң туугандары тарабынан ооруканага жеткирилген. Алдын ала маалыматтарга караганда абалы канааттандыраарлык.