Иркутск шаарында эки кабаттуу үйдүн үстүнө учак кулады

Орусиянын Иркутск шаарындагы эки кабаттуу үйдүн үстүнө учак кулап, 2 учкуч көз жумду. Бул тууралуу орусиялык басылмалар жазышты.

Белгилүү болгондой, кырсык кечээ, 23-октябрда катталган.

"Анда СУ-30 үлгүсүндөгү учак Иркутск шаарынын Ново-Ленино кичи районундагы Пржевальск көчөсүндө жайгашкан эки кабаттуу үйдүн үстүнө кулап, андан соң өрт чыккан. Учурда өрт өчүрүлдү. Тилекке каршы, кырсыктан 2 учкуч каза болду. Ал эми жай тургундардын арасында жабыркагандар катталган жок, тактап айтканда кырсык учурунда алар үйдө болгон эмес", - деп жазылат маалыматта.

Ошондой эле СУ-30 учагы сыноо учурунда кырсыкка кабылганы, анын кесепетинен 150 үй электр жарыгысыз калганы маалымдалды.