Илон Маск Твиттердин кызматкерлеринин 75 пайызын жумуштан кетириши мүмкүн

Америкалык ишкер, Tesla жана SpaceX компанияларынын негиздөөчүсү Илон Маск Твиттерди сатып алуу келишими аяктаса, кызматкерлердин 75 пайызын кыскартууну пландоодо. Бул тууралуу чет элдик басылмалар жазышууда.

Маалыматта айтылгандай, учурда компанияда 7500 кызматкер иштейт. Эгер штатта кыскартуу болсо 2000 кызматкер гана калат.

"Компаниянын учурдагы жетекчилиги келерки жылдын аягына чейин айлык акыны 800 миллион долларга кыскартууну пландаган, башкача айтканда кызматкерлердин 25 пайызга жакыны кыскарышы мүмкүн. Мындан тышкары компания инфраструктураны, анын ичинде 200 миллиондон ашык колдонуучу үчүн социалдык тармакты камсыз кылган маалымат борборлорун кыскартууну пландаштырган.

Бул олуттуу кыскартуулардын себеби тактала элек. Ал эми компаниянын жетекчилиги бул пландарды четке кагууда.

Буга чейин Твиттерде иштеген маалымат таануучу Эдвин Чендин айтымында, кызматкерлердин санынын кыскарышы социалдык тармактын колдонуучуларын хакердик чабуулга кабылуу коркунучуна дуушар кылышы мүмкүн, ошондой эле адепсиз материалдардын ачык жарыяланышына алып келиши ыктымал", - деп жазылган маалыматта.

Автор: Сезим Жумагулова