Бүгүн абитуриенттер үчүн кышкы ЖРТга кошумча каттоо болот (убактысы)

Бүгүн, 25-ноябрда жогорку окуу жайларга кышкы кабыл алуу үчүн Жалпы республикалык тестирлөөгө кошумча каттоо жүргүзүлөт. Бул тууралуу Билим берүү жана илим министрлигинин маалыматында көрсөтүлөт.

Билдирмеге таянсак, каттоо 13:00дөн 17:00гө чейин онлайн өтөт.

Ал эми Жалпы республикалык тестирлөө (ЖОЖдорго кышкы кабыл алуу үчүн) 26-27-ноябрда болот.

Тестирлөө борборлору:

1. Бишкек шаарындагы №72 орто мектеби;

2. Бишкек шаарындагы №95 окуу-тарбия комплекс мектеп-гимназиясы;

3. Ош шаарындагы “Жетиген” мектеп-лицейи.

Каттоого мамлекеттик үлгүдөгү документтер менен ырасталган жалпы орто же кесиптик орто билими бар жана учурда 2022-2023-окуу жылында ЖОЖдордо окубаган адамдарга уруксат берилет.

Алдын ала өтүнмөлөр боюнча 49 жогорку окуу жай кышкы кабыл алууну өткөрөт. Анын ичинен 17 мамлекеттик, 32 менчик окуу жай.

Автор: Айжанар Рыспек кызы
Фото: Айпери Бакталбек кызы