Бишкекте жолдорго жана тротуарларга чачуу үчүн атайын туз салынган кутулар орнотулду

"Тазалык" муниципалдык ишканасынын кызматкерлери борбор калаанын жолдорунун унаа жүрүүчү бөлүгүнө жана тротуарларга туз себүү үчүн атайын кутучаларды даярдап орнотушту. Бул тууралуу бүгүн, 29-ноябрда мэриянын маалымат кызматынан билдиришти.

Маалыматка ылайык, жалпысынан шаар боюнча ушундай 77 кутуча орнотулган. Жолдорго чачуу үчүн кыш мезгилине 6 миң тонна туз даярдалган.

Шаарды санитардык тазалоо жана катуу таштандыларды чыгаруу үчүн линияда 622 тазалоочу, 200 жүктөгүч жана 98 атайын техника иштеп жатат.

Жолдун жээгиндеги карды тазалоого 35 атайын техника, 2 кар тазалоочу трактор, 4 универсалдуу техника жана жол тейлөө башкармалыгынын 40 кызматкери тартылат.

Автор: Бек Оморбеков
Фото: Бишкек шаардык мэриясы