Оштогу мыкаачылык: Өлкө боюнча 30дан ашык блокпост коюлду

Оштогу мыкаачылык менен адам өлтүрүү жана сабоо боюнча ыкчам комплекстүү иш-чаралар азыркы күндө да күчөтүлгөн тартипте жүрүүдө. Бул тууралуу ички иштер министринин орун басары Нурбек Абдиев маалымат жыйында айтты.

"Бул кылмыш болгондон кийин ички иштер органдары атайын пландын негизинде республиканын бардык аймактарында кылмышкерлерди кармоо боюнча масштабдуу иштер жүргүзүлдү. Иш-чаранын алкагында шектүүлөргө жана алардын жакындарына тинтүү иштери жүргүзүлүп, унаалар текшерүүгө алынды.

Комплекстүү иш-чаралар азыркы күндө да күчөтүлгөн тартипте жүрүүдө. Жалпысынан республика аймагында 30дан ашык блокпост коюлуп, анда 8 миңден ашуун унаа текшерилип, 5735 укук бузуулар аныкталды", - деди Абдиев.

Белгилей кетсек, 13-январга караган түнү Ош шаарынын Курманжан датка көчөсүндө уюшкан кылмыштуу тобунун эки мүчөсү мыкаачылык менен сабалып, бирөө каза болгон.

Өзгөчө оор кылмыштын уюштуруучусу делип кылмыш чөйрөсүндө “Женго” деген каймана ат менен таанымал болгон Кадыр Досонов кармалып, дагы беш жаран издөөгө алынган болчу.

14-январда жогоруда аталган кылмышка шектелип издөөдө жүргөндөрдүн экөөсү Чүй облусунун аймагынан кармалганы кабарланган. Дагы бир шектүү ушул эле күнү Ош облусунун аймагынан колго түшүрүлгөнү кабарланган. 15-январда дагы бир шектүү Бишкек шаарынын аймагынан кармалган.

Автор: Азат Бейшенбеков