Нарында өзгөчө кырдаал режими алынды

Бүгүн, 22-февралда Нарын облусунун аймагына киргизилген өзгөчө кырдаал режими алынды. Бул тууралуу президенттин облустагы ыйгарым укуктуу өкүлчүлүгүнөн билдиришти.

Маалыматка ылайык, Бишкек-Нарын-Торугарт унаа жолунун 286-306-чакырымдарындагы унаа жолго кооптуулук жараткан кар көчкүлөрү өз алдынча жана мажбурлоо жолу менен түшүрүлдү.

"Нарын гидрометеорология борборунун башчысы Талант Үсөналиевдин билдирүүсү боюнча аталган жол каттамынын 301-306-чакырымында (Кара-Үңкүр капчыгайынын ичи) майда көчкү түшүү кооптуулугу дагы деле бар. Ошондуктан айдоочулар 500 метр аралыкты жана жол коопсуздук эрежелерин сактоосу зарыл", - деп жазылат маалыматта.

Мындан тышкары Бишкек-Нарын-Торугарт жол каттамы ачылганы маалымдалды.

Эске салсак, 17-февралда Нарын облусуна өзгөчө кырдаал режими киргизилген.

Автор: Айжанар Рыспек кызы