"Кылмыш иши токтотулду". Жаныбек Абиров жабырлануучу менен жолугуп, элдешти (видео)

Жогорку Кеңештин мурдагы депутаты Жаныбек Абиров ур-токмокко алынган жаран менен элдешти. Бул тууралуу SUPER.KG порталына өздүк булактар билдиришти.

Бизге жеткен маалымат боюнча, бүгүн тараптар жолугушуп, күзөтчүдөн жана анын үй-бүлө мүчөлөрүнөн кечирим сурашкан. Күзөтчүнү ур-токмокко алган тарап жабырлануучу жана анын энеси менен жолугушуп, элдешти. Жабырлануучу тарап дагы ыйык Орозо айында кечиримдүү болуу керектигин жана бири-бирин түшүнбөстүктүн айынан ушул окуя болуп кеткенин белгилешип, кечиришкенин айтышкан.

Эске сала кетсек, 12-мартта Жаныбек Абиров мушташка катышканы белгилүү болгон. Мушташтан жабыркаган жаран Улуттук госпиталга жаткырылган.

Бул кадамы үчүн Абиров социалдык тармактагы баракчасы аркылуу элден кечирим сураган.

Ал эми 15-мартта Жогорку Кеңеш Жаныбек Абировго карата кылмыш ишин козгоого макулдук алуу үчүн Башкы прокурор киргизген сунушту карап, атайын депутаттык комиссия түзүлгөн.

27-мартта Жаныбек Абиров жоопкерчиликти сезип жатканын айтып, депутаттык мандатын тапшыра тургандыгын билдирген. Анын арызы БШКда каралып, Абиров мандатынан ажыратылган.