Нарындагы алтын чыгарган жерде айдоочу унаасы менен кошо сууга түшүп кетти. Ал изделүүдө (видео)

Нарындагы Солтон-Сары алтын кенинде айдоочу жүк ташуучу унаасы менен кошо сууга түшүп кетип изделүүдө. Бул тууралуу өзгөчө кырдаалдар министрлигинин басма сөз кызматы билдирди.

Билдирүүгө ылайык, Солтон-Сары жайлоосунда иштеп жаткан алтын кен комбинаттын 31 жаштагы жумушчусу Ж.А. жүк ташуучу унаа менен сууга түшүп кеткендиги тууралуу маалымат 5-апрелде саат 16:40та 102 кызматынан түшкөн. Кырсык катталган жерге Нарын шаары жана Нарын райондук өзгөчө кырдаалдар бөлүмүнөн 4 куткаруучу Солтон-Сары жайлоосуна саат 17:10до чыгып, 20:30да жерине жетишкен.

"Куткаруучуларга кошумча 6-апрелде таңкы саат 6:00дө аталган кырдаалды координациялоо үчүн министрликтин Нарын облусу боюнча башкармалыгынан, Нарын шаары жана Нарын району боюнча Өзгөчө кырдаалдар бөлүмүнүн башчысы, Кочкор райондук өзгөчө кырдаалдар бөлүмүнөн суучул-куткаруучусу жана 5 кызматкер жөнөтүлдү", - деп билдиришти ӨКМдан.

Учурда жүргүзүлүп жаткан издеп куткаруу иштеринин натыйжасы тууралуу кошумча маалымат берилет.