Ат-Башыда өзгөчө кырдаал режими киргизилди

Нарын облусунун Ат-Башы районуна 3-майдан тарта өзгөчө кырдаал режими киргизилди. Бул тууралуу ӨКМдан кабарлады.

Белгилүү болгондой, мындай чечим Арпа өрөөнүндөгү Ак-Бейит, Беш-Сары, Ичке, Кемесия тилкелеринде калган малчыларга ыкчам жардам көрсөтүү жана кырдаалды жөнгө салуу максатында кабыл алынды.

"Арпа өрөөнүндө 2-майдан тарта аба ырайы кескин өзгөрүп, кар калың жаап, жайлоодо 5 үй-бүлө мал жандыктары менен калган. Малчыларда 867 уй, 1400 кой бар болгон. Учурда алардын тамак-аштары жетиштүү, бирок мал жандыктардын тоюту жок болгондугуна байланыштуу малчылар жардам сурап кайрылган.

ӨКМдан ыкчам топ тартылып, Ат-Башы районунун акиминин орун басары жеринде болуп жаткан абалдан кабар алып, жергиликтүү бийлик тургундар менен биргеликте жерине 680 түк чөп жеткиришти" деп билдиришти министрликтен.

Учурда жол каттамы ачык.

Автор: Айжанар Рыспек кызы