Жогорку Кеңеш президентке Эдил Байсаловду кызматтан бошотуу сунушун жөнөттү

Бүгүн, 22-июндагы Жогорку Кеңеш жыйынында депутаттар президентке министрлер кабинетинин төрагасынын орун басары Эдил Байсаловду кызматынан бошотуу сунушун жөнөттү.

Мындай демилге "Ата-Журт Кыргызстан", "Ишеним" фракцияларынын жана "Мекенчил" депутаттык тобу тарабынан парламентке сунушталды. Аны 72 депутат колдоп, үчөө каршы болду.

Бүгүн бир катар депутаттар министрлер кабинетинин төрагасынын орун басары Эдил Байсаловду отставкага кетирүү боюнча маселени күн тартибине киргизүүнү сунуштаган.

Эскерте кетсек, Байсалов 20-июнда Жогорку Кеңештин социалдык саясат боюнча комитетинин жыйынында депутаттар менен айтыша кеткен. Ал "парламенттин чечимдери кеңеш берүүчү мүнөздө гана экенин" айтып, депутаттарды сындаган.