Тоңдо сел жүрүп, 30га жакын турак үйдү каптады (фото)

Ысык-Көл облусунун Тоң районунда катуу жааган жамгырдан улам сел жүрүп, 30га жакын турак үйдү суу басты. Бул тууралуу Өзгөчө кырдаалдар министрлигинен билдиришти.

Маалыматка ылайык, Тоң районундагы Көк-Мойнок-1 айылында кыска мөөнөттө жаап өткөн жамгырдын кесепетинен кокту-колоттордон келген суулар чогулуп, айылды каптаган. Ылай суу турак үйлөрдүн короо-жайларын, жер төлөлөрүн жана ички жолдорго жайылып, зыянга учураткан.

Бүгүн, 28-августта аталган аймакка ӨКМдан 40тан ашуун кызматкер барып, 8 техниканын жардамы менен турак үйлөрдү сел суусунан тазалоо иштерин жүргүзүп жатат.

Автор: Жанбулат Жумабеков
Фото: Өзгөчө кырдаалдар министрлиги