Вебкам иштетүүгө шектелген Даниел Ажиевдин камактагы мөөнөтү узартылды

Вебкам студияларды уюштурууга шектелип кармалган Даниел Ажиевдин камактагы мөөнөтү узартылды. Биринчи Май райондук сотунун басма сөз кызматынан билдиришкендей, мындай чечим кечээ, 27-сентябрда кабыл алынган.

Маалым болгондой, Даниел Ажиев 29-ноябрга чейин Улуттук коопсуздук боюнча мамлекеттик комитетинин тергөө абагында камакта болот.

Белгилей кетсек, УКМК 5-июнда Даниэл Ажиев жетектеген көп сандагы вебкам-студияларынын тармагын уюштурган трансулуттук кылмыштуу топтун ишмердүүлүгүнө бөгөт коюлганын кабарлаган.

Ал БАЭге качып кетүү үчүн Өзбекстанга барганда колго түшүп, 4-июнда Кыргызстанга өткөрүлгөн. Чекисттер Ажиевдин вебкам-студияларында 18ден 25 жашка чейинки 300гө жакын адам интимдик мүнөздөгү кызматтарды көрсөтүп келгенин билдирген.

5-июнда Биринчи Май райондук сотунун чечими менен Ажиев 29-июлга чейин УКМКнын тергөө абагына камалган. 24-июлда болсо аталган райондук соттун чечими менен вебкам студияларды уюштурган деген шек менен кармалган Даниел Ажиевдин абактагы мөөнөтү узартылып, ал 29-сентябрга чейин камакта калтырылган болчу.

Ажиев менен анын жактоочулары эч кандай комментарий бере элек.

Автор: Ширин Марат кызы