Садыр Жапаров жаңы Ак үйдүн аталышы боюнча билдирүү таратты

Президент Садыр Жапаров жаңы Ак үйдү "Ынтымак-Манас ордосу" деп атоону сунуштады. Бул тууралуу ал бүгүн, 18-октябрда өзүнүн Фейсбук баракчасына жазып чыкты.

Ал мындан бир жума мурда курулушу аяктап калган Президенттик администрациянын имаратынын атын тандоо боюнча кеңеш сурап кайрылгандыгы тууралуу жазып, сунушталган варианттардын ичинен "Ынтымак-Манас ордосу" деген аталышты ылайыктуу деп тапкандыгын айтты.

"Талкууга жигердүү катышып, ар түрдүү варианттарды сунуштаганыңыздар үчүн баарыңыздарга терең ыраазычылык билдирем. Сунушталган варианттардын ичинен төмөнкү төрт аталыш көбүрөөк аталыптыр: "Ак Ордо", "Кут Ордо", "Айкөл Ордо" жана "Ынтымак Ордо". "Ынтымак Ордосу" болсун деген сунуш жеке менин сунушум эле. Көпчүлүктүн сунуштарынан улам, дагы бир атты кошуп, Ынтымак-Манас Ордосу десек ылайык болчудай", - деди Садыр Жапаров.

Мындан тышкары ал эл тарабынан көп варианттар сунушталгандыгын, алардын бир тобу окшош экендигин айтты. Жалпы 108 вариант сунушталды.

Автор: Гүлкайыр Абдиманнап кызы