"Кнопкам басылбай калыптыр". Тууну өзгөртүүгө добуш бербеген депутаттар мыйзамды колдой турганын айтып чыкты (видео)

Кечээ, 20-декабрда мамлекеттик туунун элементтерин өзгөртүү боюнча мыйзам долбооруна добуш бербеген Жогорку Кеңештин төрт депутаты бүгүн микрофонго чыгып, эмне себептен добуш бербей калганын айтышты.

Алар өз сөзүндө долбоорду колдой турганын, стенограмма үчүн айтып коюуну туура көрүшкөнүн белгиледи.

Гүлкан Молдобекова («Альянс» фракциясы): Мыйзам долбоору каралып жатканда шайлоочуларым келип калып добуш берүүгө жетише албай калдым. Тууну өзгөртүү боюнча мыйзам добоорун колдойм, макулмун. Фракциянын чечимин дагы бергенбиз. Жанар Акаев дагы иш сапарында болгондуктан катыша албай калды.

Азамат Исираилов («Альянс» фракциясы): Мен дагы катыша албай калгам, мен да колдойм. Стенограмма үчүн айтып коёюн.

Арсланбек Малиев (Жети-Өгүз округу): Кечээ мен жок элем, кнопкам (добуш берүүчү) басылбай калыптыр. Негизи мен азыркы өзгөртүүнү колдойм, бирок мен желектин түсү көк болсун деп келем, кийин ошону баары бир киргизем.

Данияр Төлөнөв (Куршаб округу): Экинчи окууда добуш бергем, үчүнчү окууда компьютерим иштебей калды. Ошондуктан добуш бере албай калдым. Мен толугу менен колдойм.

Белгилей кетсек, кечээ Жогорку Кеңештин жыйынында мамлекеттик туунун элементтерин өзгөртүү боюнча мыйзам долбоору дароо экинчи жана үчүнчү окууда талкуусуз кабыл алынды. Анда 90 депутаттын 79у каттоодон өтүп, анын 59у макул, 5 эл өкүлү каршы добуш берген. Ал эми 15 депутат добуш берүүгө катышпай калса, 11и жыйынга келген эмес.

Мыйзам долбоору каралып жатканда жыйынга катышпагандар:

1. Чыңгыз Айдарбеков («Альянс»)

2. Султанбай Айжигитов («Ыйман Нуру»)

3. Жанар Акаев («Альянс»)

4. Фарходбек Алижанов («Альянс»)

5. Дастанбек Жумабеков (Манас округу)

6. Эмил Жамгырчиев («Альянс»)

7. Тазабек Икрамов (Сузак округу)

8. Гуля Кожокулова («Бүтүн Кыргызстан»)

9. Адахан Мадумаров («Бүтүн Кыргызстан»)

10. Исхак Масалиев («Бүтүн Кыргызстан»)

11. Эльвира Сурабалдиева (Биринчи Май округу)