Бакыт Төрөбаев айыл чарба министри болуп дайындалды

Бакыт Төрөбаев министрлер кабинетинин төрагасынын орун басары — суу ресурстары, айыл чарба жана кайра иштетүү өнөр жай министри болуп дайындалды. Бул тууралуу бүгүн, 28-декабрда президенттин басма сөз кызматынан билдирди.

Маалыматка ылайык, тиешелүү жарлыкка өлкө башчы Садыр Жапаров кол койду.

Министрлер кабинетинин төрагасынын орун басары Төрөбаевди Суу ресурстары, айыл чарба жана кайра иштетүү өнөр жайы министринин милдетин аткаруучу кылып дайындоо тууралуу жарлыкка Садыр Жапаров 25-декабрда кол койгон.

Жогорку Кеңеш 27-декабрдагы жыйынында анын талапкерлигин жактырган.

Мамлекет башчынын дагы бир жарлыгы менен Айыл чарба министрлиги Суу ресурстары, айыл чарба жана кайра иштетүү өнөр жайы болуп кайра түзүлдү. Министрликти буга чейин жетектеп келген Аскарбек Жаныбеков башка ишке өткөнүнө байланыштуу кызматынан бошотулган.

Бакыт Төрөбаев 2022-жылдын 30-мартынан бери Министрлер кабинетинин төрагасынын орун басары болуп иштеп келет.

1973-жылы 5-апрелде Жалал-Абад шаарында туулган.

Жогорку билимдүү. 1999-жылы Кыргыз Мамлекеттик Улуттук Университетин бүтүргөн. Адистиги боюнча экономист.

Эмгек жолун 1995-жылы «Жамиля и К» өндүрүш-коммерциялык фирмасында директордун кызматынан баштаган.

1998-1999-жылдары айыл чарба продукцияларын өстүрүү боюнча «Азия-Сузак» дыйкан чарбасынын төрагасы.

2000-2007-жылдары «Мариям» ЖЧК ун комбинатынын башкы директору.

2007-2009-жылдары IV чакырылыштагы Жогорку Кеңештин депутаты.

2009-2010-жылдары Өзгөчө кырдаалдар министри.

2010-жылы V чакырылыштагы Жогорку Кеңештин депутаттыгына шайланган.

2011-жылдан 2013-жылдын июнь айына чейин - Жогорку Кеңештин төрагасынын орун басары.

2013-жылдын 25-апрелинен баштап «Өнүгүү-Прогресс» саясий партиясынын төрагасы.

2015-жылы 4-октябрда VI чакырылыштагы Жогорку Кеңештин депутаттыгына шайланган.