"Ойлондуруп турат". Садыр Жапаров "Кытай-Кыргызстан-Өзбекстан" темир жолу өзүн качан актай турганын айтты

Үч өлкөнүн биргелешүүсү менен курула турган "Кытай-Кыргызстан-Өзбекстан" темир жолу өзүн 35-40 жылда актайт. Бул тууралуу президент Садыр Жапаров "Кабар" маалымат агенттигине берген маегинде айтты.

Президент өз сөзүндө бул өтө чоң долбоор болгондуктан ойлондуруп жатканын жашырган жок.

"Кытай-Кыргызстан-Өзбекстан" темир жолу бизди ойлондуруп турат. Өтө чоң сумма. Бул долбоор өзүн 35-40 жылда актайт.

Бирок кыргыз мамлекети дүйнөгө чыгууда туюк болбой транзиттик өлкөгө айланабыз. Ошондуктан, бул жол өмүр бою кыргыз элине, мамлекетибизге кызмат кылат.

Бул долбоорду сырттан карыз алуу жолу менен эмес, башкача жол аркылуу ишке ашыруунун жолун издеп жатабыз. Кудай буюрса, бул маселени да чечебиз. Темир жолду курууну жакынкы убакта баштайбыз.

Башка долбоорлорго алынып жаткан сырткы карыздарыбыздан эч кам санабай эле койсоңуздар болот. Азыр жасалып жаткан ар бир долбоор мамлекеттик бюджетке күч келтирбестен, өзүн-өзү актай турган долбоорлор.

Илгерки алынган карыздар кумга сиңген суудай эле болуп кетиптир. Же өзүн-өзү актаган эмес, же мамлекетке келтирген пайдасы болгон эмес.

Мындан ары андайга жол бербейбиз. Ар бир долбоорду “жети өлчөп, бир кесебиз”. Өзүн-өзү кыска мөөнөттө актабаган долбоорлорду кабыл албайбыз", - деген Жапаров.

Автор: Азат Бейшенбеков