Бишкек мэриясы 44 мектепте сабактар 07:30да башталарын айтты

Жаңы окуу жылында Бишкектеги 44 мектепте сабактар саат 07:30да башталат. Бул тууралуу бүгүн, 26-июлда мэриянын басма сөз кызматынан билдирди.

Маалыматка ылайык, бүгүнкү күндө 103 муниципалдык мектеп 198 миң 129 балага билим берет.

"Анын 14үндө окуу 3 нөөмөт менен жүргүзүлөт, дагы 14 мектепте сабактар саат 07:30да башталат. Жаңы 2024-2025-окуу жылында дагы 30 мектепте 07:30дан баштап окутуу пландалууда.

Ошентип иштеп жаткан муниципалдык мектептердин 42 пайызы эртең мененки саат 07:30дан баштап окууга өткөрүлөт", - деп билдиришти мэриядан.

Ошондой эле Бишкек мэриясы ата-энелерге унааларды мектептердин жанынан токтотууга тыюу салынарын, эреже бузгандар айыпка жыгыларын эскертет.

Мындай чечим шаардагы жол тыгынды жоюу максатында кабыл алынган.

Автор: Айпери Бакталбек кызы
Фото: Айпери Бакталбек кызы