Зевс менен Посейдон айкелинин автору. Балыкчынын жаңы шайланган мэринин өмүр баяны

Бүгүн, 2-июлда Балыкчы шаарынын мэри Азамат Арнабек уулу ээлеген кызматынан бошотулду. Анын ордуна президент Садыр Жапаровдун жарлыгына ылайык, Султан Кермалиев Балыкчы шаарынын мэри болуп дайындалды. Төмөндө Султан Кермалиевдин өмүр баянын сунуштайбыз.

Кермалиев Султан Шарипканович 1989-жылы 25-июнда Бишкек шаарында туулган. 2007-жылы Кыргыз-Орусия Славян университетин "өнөр жай жана жарандык курулуш" адистиги боюнча бүтүргөн. Кесиби боюнча - инженер. Эмгек жолун алгач ширетүүчү (сварщик) катары баштаган.

2014-жылдын 23-майынан тарта "Шарипкан" ЖЧКсынын жетекчиси. Компания негизинен сырье – курулуш материалдары өндүрүү, дизайнерлик пирстерди долбоорлоо жана куруу менен алектенет.

Анын эң белгилүү иштеринин катарында Чолпон-Атадагы комуз формасындагы пирс, ошондой эле Балыкчы шаарына орнотулган Зевс жана Посейдон скульптуралары бар. Бул объекттер азыркы учурда туристтер көп барган жерлердин бирине айланган.

2023-жылы президенттин Ысык-Көл облусундагы ыйгарым укуктуу өкүлүнүн Ардак грамотасы менен сыйланган. 2024-жылдын май айында жана 2025-жылдын ноябрь айында экономикалык жана өндүрүштү уюштуруу боюнча өкмөттүк резервдик программа (ӨРП) курстарынан өткөн. Үй-бүлөлүү. Бир кыз, эки уулдун атасы.