“Кыргызнефтегазда” коррупция фактысы боюнча кылмыш иши козголду

“Кыргызнефтегаз” ишканасында мүмкүн болгон коррупциялык схема боюнча кылмыш иши козголду. Бул тууралуу Ички иштер министрлигинин басма сөз кызматынан билдиришти.

Маалыматка ылайык, Мамлекеттик салык кызматы тарабынан даярдалган “Өз адамдар үчүн мунай: Кыргызнефтегазды" кантип курутушту” аттуу иликтөөнүн негизинде ишкананын айрым кызмат адамдары мыйзамсыз аракеттерге барганы аныкталган.

Тергөөнүн алдын ала жыйынтыктары боюнча, кызматкерлер кызматтык абалынан кыянаттык менен пайдаланып, байланышкан компаниялар менен сүйлөшүү аркылуу күйүүчү-майлоочу материалдарды сатууда мыйзамсыз схемаларды уюштурушкан. Натыйжада айрым жеке жактар үчүн артыкчылыктуу шарттар түзүлүп, мамлекетке зыян келтирилгени айтылууда.

Ошондой эле күйүүчү-майлоочу майлардын баасы өсүп жаткан шартта, жооптуу кызматкерлер рынокту жөнгө салуунун ордуна, көзөмөлдөөчү органдардын айрым өкүлдөрү менен алдын ала сүйлөшүүгө барышканы белгиленди.

Бул факт боюнча Кылмыш-жаза кодексинин 336-беренеси (Коррупция) менен кылмыш иши козголуп, учурда кеңири тергөө иштери жүрүп жатканы маалымдалды.

Автор: Айзада Кыдырмышева