Бишкектеги Евразиялык орус тили, маданияты жана инклюзия борборунда “Говорухин: кино - Жеңиштин эстелиги” аттуу тегерек үстөл өттү. Талкуу “Кинопанорама” эл аралык кинофорумунун алкагында жана “Жеңиш 9/45” патриоттук кыймылынын демилгеси менен уюштурулду.
Жыйынга Орусиядан келген актёрлор, Кыргызстан жана Орусиянын кино тармагынын өкүлдөрү, искусство таануучулар жана студенттер катышты.
Катышуучулар Станислав Говорухиндин чыгармачылык мурасы жана анын заманбап киного тийгизген таасири тууралуу кеңири сөз кылышты. Алар режиссёрдун эмгектерин эскерип, анын кинематографиянын өнүгүшүнө кошкон салымын жана фильмдеринин Улуу Ата Мекендик согуш тууралуу тарыхый эстеликти сактоодогу маанисин талкуулашты. Өзгөчө көңүл белгилүү тасмаларга, анын ичинде “Место встречи изменить нельзя” телефильминe бурулду.
“Кинематография - тарыхый эстеликти жеткирүүнүн күчтүү куралы. Говорухиндин чыгармачылыгы аркылуу биз тарыхтагы учурларды кайрадан сезип, алардын маанисин баалай алабыз”, - деп белгиледи “Евразия-Кинофест” эл аралык кинофестивалынын программалык директору Александра Жукова.
Ал эми АНО “Евразия” коммерциялык эмес уюмунун маданият аралык программалар жана эл аралык долбоорлор департаментинин жетекчиси Вячеслав Матвейчук белгилегендей, «Кинопанорама» форумы Евразия мейкиндигиндеги өлкөлөрдө тартылган Улуу Ата Мекендик согуш тууралуу тасмаларды бириктирип, Станислав Говорухиндин туулгандыгынын 90 жылдыгына арналган.
«Режиссёр жана Орусия Федерациясынын эл артисти Говорухиндин кинематографияны өнүктүрүүгө кошкон салымын баалоо кыйын. Ал көрүүчүнү экрандагы ар бир актёрго, сюжетке жана эмоцияга ишенүүгө үйрөткөн. Анын чыгармачылыгы бүтүндөй бир муунга — актёрлор менен режиссёрлорго таасир берип, алар анын ыкмаларын өздөрүнүн кино философиясына сиңиришкен. “Кинопанорамада” тарыхый эстеликти сактоо темасы өзгөчө орунду ээлейт. Классикалык кино аркылуу уюштуруучу — “Евразия” уюму — Улуу Жеңиштин чыныгы маанисин эске салууну көздөйт. Борбордук идея — согуштагы жеңиш элдердин биримдигинин аркасында мүмкүн болгонун көрсөтүү», — деди ал.
Ошондой эле Евразиялык орус тили жана маданият борборунда билим берүү программалары да өткөрүлдү. Алардын катарына режиссура, актёрдук чеберчилик жана сахналык сөз боюнча мастер-класстар кирип, Станислав Говорухиндин методдоруна негизделди. Тажрыйбалуу окутуучулардын жетекчилиги астында катышуучулар режиссёрдун иш ыкмаларын тереңирээк түшүнүүгө жардам берген уникалдуу билим жана көндүмдөргө ээ болушту.
Уюштуруучу тууралуу:
«Евразия» — эл аралык кызматташтыкты өнүктүрүүгө көмөктөшкөн автономдуу коммерциялык эмес уюм болуп саналат. Уюм жеке каражаттардын эсебинен долбоорлорду ишке ашырат. «Евразиянын» миссиясы — ар түрдүү курактагы жана кесиптеги адамдарды бириктирип, салттуу баалуулуктарды, тарыхый эстеликти жана Евразия элдеринин жалпы маданий кодун сактоо.
Уюмдун программалары билим берүү, медицина, маданият, ыктыярчылык жана кайрымдуулук сыяктуу ар түрдүү тармактарды камтыйт. Негизги долбоорлор орус тилинин континенттеги маданият аралык диалог куралы катары ролун бекемдөөгө багытталган.
«Евразия» ар кайсы өлкөлөрдөн келген балдарга, үй-бүлөлөргө жана жаштарга жаңы мүмкүнчүлүктөрдү ачып, мугалимдердин, дарыгерлердин, журналисттердин, окумуштуулардын жана эксперттердин кесиптик коомчулуктарын өнүктүрөт. Ошондой эле уюм экологиялык, ыктыярчылык жана гуманитардык миссияларды ишке ашырат. Эки жыл ичинде «Евразиянын» демилгелерин дүйнөнүн дээрлик 40 өлкөсүнөн 120 миңден ашуун адам колдогон.
