Испаниянын жаңы падышасы бийликти өткөрүп алды (фотолор)

Кечээ, 19-июнда Испаниянын жаңы падышасы Филипп VI атасы тактан баш тарткандан кийин бийликти расмий түрдө кабыл алып, парламенттин төмөнкү палатасында ант берди. Бул тууралуу чет элдик маалымат каражаттары жазып чыгышты.

Маалыматка ылайык, жаңы монархтын такка отуруу аземи абдан жупуну өттү. Ал тургай таажы кийүү салтанаты болгон жок. Бийликтегилер экономикалык кыйынчылыкты тартып жаткан испандыктарды туталантууну каалашкан эмес.

Жубайы менен эки кызы күбө болгон аземде жаңы падыша экономикалык жана конституциялык каатчылыкты баштан кечирген өлкөнү биримдикке үндөп, өлкөнүн Конституциясын коргоого ант берди.

Андан соң падыша менен анын жубайы Летиция Мадриддин көчөлөрүн аралап өтүп, падыша сарайынын балконуна чыгып, салтка ылайык элге көрүнүштү.

Фелипе Астурийский 1968-жылы 30-январда Мадрид шаарында жарыкка келген. Орто мектепти аяктаган соң экономика, юриспруденция, эл аралык мамилелер боюнча билим алган. 2003-жылы журналист Летиция Ортис Рокасоланого үйлөнүп, учурда бул үй-бүлө эки кызды тарбиялап келет.

Кошумчалай кетсек, Фелипе Астурийскийдин атасы, падыша Хуан Карлос диктатор Франсиско Франко 1975-жылы дүйнөдөн өткөндөн кийин Испаниянын демократияга өтүшүндө маанилүү роль ойногон.

Автор: Дамира Арстанова
Фото: Интернеттен алынды