Райондук сот Урмат Ишенбековду мандаттан ажыратуу боюнча БШКнын чечимин колдоду

Бишкектин Биринчи Май райондук соту Жогорку Кеңештин депутаты Урмат Ишенбековду мандаттан ажыратуу боюнча Борбордук шайлоо комиссиясынын чечимин колдоду. Сот чечими бүгүн, 8-февралда кабыл алынды. Буга чейин Ишенбековдун жактоочулары депутатка мандатын кайтарып берүүнү өтүнүшкөн эле.

Эскерте кетсек, Борбордук шайлоо комиссиясы 3-февралдагы жыйынында депутат Урмат Ишенбековду мандаттан ажыратуу чечимин чыгарган. БШКнын мүчөсү Рашид Бекбасаров: "Жумалиева менен Эсенаманова боюнча БШК чыгарган чечимди сот мыйзамдуу деп тапса, демек, Ишенбековду мандаттан ажыратуу боюнча фракция чечимин карабай коюуга негиз жок",- деди комиссия жыйынында.

Парламенттеги "Кыргызстан" фракциясынын жетекчилиги "өздөрү арыз жазышты" деген негизде фракциядагы 3 депутаттын ыйгарым укуктарын мөөнөтүнөн мурун токтотуу өтүнүчү менен БШКга кайрылган. Депутаттар Элмира Жумалиева менен Чолпон Эсенаманованы мандаттан ажыратуу чечими кабыл алынып, БШК чечимин Жогорку Сот туура деп тапкан. Ал эми үчүнчү депутат Урмат Ишенбеков депутаттыктан баш тартууга арыз жазбаганын өз убагында БШКга кабарлагандыктан, аны мандаттан ажыратуу маселесин кароо артка жылдырылган эле.

Ишенбеков жакында парламент жыйынында: "Мен дагы бир жолу айтып коёюн, депутаттыктан кетүүгө эч кандай арыз жазган жокмун. БШКнын мүчөлөрүнө кайрылам, мени да мандаттан ажыратып жүрбөгүлө",- деп билдирүү жасаган эле.

Мандаттан ажыраган депутаттар фракция жетекчилиги жасалма арыз менен мандаттан ажыратып салганын айтышууда.