13:14 Сөз эркиндигине байланыштуу жөө жүрүш бүттү.
13:06 Жөө жүрүштүн катышуучулары тарап жатышат. Учурда 30дай адам калды.
12:49 Каныбек Иманалиев милиция бөлүмүнөн чыгып келди. Калган балдар бир саатта бошотуларын айтты. "Бир саат күтөлү. Бирөөнү да камакта таштабашыбыз керек. Азыр кармалган балдарды чыгармайынча күтөбүз" деди депутат.
12:38 Жөө жүрүштүн катышуучулары Уркуя Салиеванын эстелигинин жанына токтошту. Иш-чара ушул жерден бүтөрү айтылды.
12:13 Равшан Жээнбеков: "Милиция кызматкерлери тарабынан кармалгандар мыйзам чегинде жооп беришет. Эч кимиси мыйзам бузган жок. Административдик айып салынышы мүмкүн", - деди.
12:08 Бир катар катышуучулар менен кошо Жогорку Кеңештин депутаты Каныбек Иманалиевди дагы кармап кетишти.
12:05 Сөз эркиндигине байланыштуу жөө жүрүштүн катышуучусу Мавлян Аскарбековду милиция кызматкерлери күч менен автобуска салышты. Эл "Мавлянга боштондук!" деп кыйкырууда. Милиция кызматкерлери активист унаа жолуна чыгып кеткени үчүн кармалганын айтышты.
11:58 Жөө жүрүштүн катышуучулары Биринчи Май райондук сотунун имаратына келишти.
11:55 Равшан Жээнбеков жаштарга кайрылып: "Эгер бүгүн бизди камашса, эртең силерди камай башташат. Ошондуктан бизге кошулгула", - деди.
11:46 Жол кайгуул кызматы жөө жүрүштүн катышуучуларынын коопсуздугун камсыздап жатышат.
11:37 Жөө жүрүшкө Алмамбет Шыкмаматов менен Каныбек Иманалиев кошулушту. Катышуучулар Медеров көчөсүнө басып келишти.
11:22 ММКлардын эгемендүүлүгү жана сөз эркиндиги үчүн жөө жүрүшкө чыккандар Байтик Баатыр көчөсү менен түндүктү карай басып келе жатышат. Ахунбаев көчөсүнө келип калышты.
11:15 Жөө жүрүштүн катышуучулары ооздоруна скотч чаптап алышты. Алар колуна "Азаттыкка азаттык", "Атамбаев сөз эркиндигинен колуңду тарт!" деген жазуусу бар плакаттарды көтөрүп алышкан.
10:44 Сөз эркиндигине байланыштуу жөө жүрүш башталды.
10:40 Жөө жүрүштүн уюштуруучусу Э.Байсалов менен милиция кызматкерлери кайым айтышты. Байсалов: "Биз колонна түзүп Абдрахманов көчөсү менен жөө жүрүшкө чыгабыз. Эч кимге тоскоолдук жаратпайбыз. Милиция биздин коопсуздугубузду камсыздап бериши керек", - деди.
10:38 Милиция кызматкерлери дагы келишти. Алардын бири катышуучуларга "Силер унаа жолу аркылуу эмес тротуар менен жөө жүрүш жасагыла. Башка жөө жүргүнчүлөргө тоскоол болбогула", - деди.
10:36 Иш-чарага 100дөй адам чогулду. Арасында экс-депутат Равшан Жээнбеков, "Вечерний Бишкектин" мурунку ээси Александр Ким бар.
10:35 Жогорку Кеңешинин депутаты Аида Салянова: "Мен депутат катары эмес, жөнөкөй жаран катары келдим. Уюштуруучулардын сөз эркиндигин коргоо ураанын колдойм", - деди.
10:30 КСДП фракциясынан Жогорку Кеңештин депутаты Жанар Акаев үй-бүлөсү менен келди.
10:26 "Ата Мекен" фракциясынан Жогорку Кеңештин депутаты Наталья Никитенко келди.
10:19 Жарандык активисттер Мавлян Аскарбеков, Адил Турдукулов, укук коргоочу Динара Ошурахунова келишти.
10:10 Жөө жүрүшкө катышуу үчүн укук коргоочулар Рита Карасартова, Өндүрүш Токтонасыров, Эдил Байсаловдор келишти.
10:00 Иш-чаранын катышуучулары Д.Асанов атындагы Жеңиш сейил багына чогулушууда. Алар жөө жүрүш менен "Ала-Тоо" аянтына барышары белгилүү болду.
Бишкекте бүгүн, 18-мартта сөз эркиндигине байланыштуу журналисттердин жана укук коргоочулардын катышуусунда жөө жүрүш өтөт.
Эске салсак, Башкы прокуратура "президент Алмазбек Атамбаевдин беделине шек келтирди" деп Азаттык менен Заноза.кг сайтын сотко берип, эки ММКдан жалпы 26 миллион доллар төлөтүүнү талап кылган. Андан кийин КСДП партиясы "кадыр-баркына жана ишкердик беделине шек келтирди" деп 24.кг маалымат агенттигин жана укук коргоочу Рита Карасартованы сотко берип, бир миллион сомдон өндүрүү боюнча арыз жазган.
