Чүй-Абдрахманов көчөсүндөгү жер алдындагы өтмөктө иштеген соодагерлер өтмөктү оңдоого каршы чыгышууда

Чүй-Абдрахманов көчөсүндөгү жер алдынан өтүүчү өтмөктө иштеген соодагерлердин саны кыскарат. Мындай маалыматты бүгүн, 27-мартта SUPER.KG порталына Муниципиалдык мүлк башкармалыгынын башчысы Султан Оморов билдирди.

"Бүгүнкү күндө өтмөктөрдө соода кылган соодагерлер менен түшүндүрүү иштерин жүргүзүп жатабыз. Бул жер заман талабына ылайык оңдолгондон кийин соода жайлардын саны кыскарат. Ал эми оңдоо иштери бүткөндөн кийин ижарага берүү маселеси каралат. Азырынча ал баскычтарга жете элекпиз. Маалымат үчүн айта кетейин, биз бул жер алдынан өтүүчү өтмөктөрдү жоопкерчилиги чектелген коомго ижарага бергенбиз. Ал бизге айына 45 миң сом гана төлөйт. 15-апрелге чейин айрым кичи дүкөндөрдү жок кылууга мөөнөт бергенбиз. Андан соң жумуштар башталат. Курулуш иштери 31-августка карата жыйынтыкталмакчы", - деп билдирди Оморов.

Чүй-Абдрахманов көчөсүндөгү жер алдынан өтүүчү өтмөктүн соодагерлери мэриянын оңдоп-түзөө аракеттерине каршы. Алар бөлүнгөн 37 миллион сомго "футбол аянтын, ат майданын оңдоого жумшасын" деген ойлорун айтышууда.

"Биз бул соода жайында 25 жылдан бери иштеп жатабыз. Убагында таштандыга толуп, селсаяктардын жатагына айланган жайды оңдоп-түзөп ишке киргизгенбиз. Жыл сайын соодагерлер өзүбүз оңдойбуз. Учурда бул жайды капиталдык оңдоого зарылчылык жок. Бишкек шаардык мэрия кайсы бир адамдардын кызыкчылыгы үчүн элди чыгарып, ал жерди оңдоп кайрадан сатууну көздөп жатат. Биз ага каршыбыз. Мындан улам баарыбыз чогулуп, президентке, Жогорку Кеңештин төрагасына кат аркылуу кайрылганбыз. Оңдуу жооп болбосо митингге чыгабыз", - деп билдирди соодагер Чолпон Рахимова.

Маалыматка ылайык, Чүй-Абдырахманов көчөсүндөгү жер алдынан өтүүчү жолдо 82 соода жайы бар. Мындагылар ай сайын жер салыгы үчүн 260 миң, патент үчүн 106 миң сом төлөшөт. Мындан сырткары электр энергия, таштанды, кароол жана башка чыгымдар үчүн жылына мэрияга 5 миллион сомдон ашуун төлөм төлөшөт. Ал эми 25 жылда 140 миллион сомдон ашуун каражат төлөшкөн.

Өтмөктөрдүн оңдолушу боюнча Капиталдык курулуш башкармалыгына байланыштык. Башкармалыктын башчысынын орун басары Койчугул Ибраимов төмөндөгүлөрдү айтып берди.

"Бүгүнкү күндө Чүй-Абдрахманов көчөсүнүн кесилишиндеги жер өтмөккө 37 миллион, Чүй-Манас көчөсүнүн кесилишиндеги жер өтмөккө 33 миллион сом шаардык мэриянын бюджетинен бөлүнгөн. Жакында оңдоо иштери башталат. Өтмөк заман талабына ылайыкташтырылып гранит таштар менен кооздолот. Жарыктандыруу, майыптар үчүн пандустарды ыңгайлаштыруу, ошондой эле бир тарабына атайын сүрөт галлереясы орнотулат".

Буга чейин Бишкек шаарынын Капиталдык курулуш башкармалыгы Чүй-Манас жана Чүй-Абдрахманов көчөлөрүнүн кесилиштериндеги жер астындагы өтмөктөрдүн эскиздерин жарыялашкан.